ISSN (Print) - 0012-9976 | ISSN (Online) - 2349-8846

ఎగిసిపడ్తున్న విద్యార్థుల నిరసన

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

జనవరి అయిదవ తేదీన శాంతియుత సమావేశం నిర్వహిస్తున్న జె.ఎన్.యు. విద్యార్థులు, అధ్యాపకుల మీద ఒక అల్లరి మూక కిరాతకంగా దాడి చేసింది. ఈ దాడి ఉద్దేశం విద్యార్థులను, అధ్యాపకులను గాయపరచడమే కాదు, వారిని నిరంతరం భయకంపితుల్ని చేయడం కూడా. ఈ దురంతం గురించి వస్తున్న చిత్రాలు చూస్తే అనేక ప్రశ్నలు తలెత్తుతున్నాయి. ఈ చిత్రాల్లో చిందరవందరగా ఉన్న గదులు, అలమారాల్లో అస్తవ్యస్తమైన వస్తువులు, నీతిని వేడి చేసుకునే పరికరాలు, ఇతర నిత్యావసర వస్తువులు, చిందరవందర అయిన దుప్పట్లు కనిపించాయి. దాడి చేసిన వారు ఏ గదుల మీద దాడి చేయాలో ముందే ఎంపిక చేసుకున్నారు. తలుపుల మీద అంబేద్కర్ బొమ్మలు అతికించి ఉన్న గదుల మీద దాడి చేశారు. లేదా ఆ గదుల్లో ఉండే విద్యార్థులు నిర్దిష్టమైన సామాజిక వర్గానికి చెందిన వారు కనక దాడులు చేశారు.

జె.ఎన్.యు.లోని విద్యార్థులు విలాసవంతమైన జీవితం ఏమీ గడపరు. కాని ఆ విశ్వవిద్యాలయం వారికి సుసంపన్నమైన జీవితం ఇస్తుంది. ఈ విధానం వారికి విమర్శనాత్మక దృక్పథం, సృజనాత్మకత, విభిన్న ప్రాపంచిక దృక్పథాలు అలవర్చుకోవడానికి తోడ్పడుతుంది. ఇందులో "వామపక్ష భావజాలం" ఒక అంశం మాత్రమే. ఆ విశ్వవిద్యాలయం గౌరవప్రదమైన జీవితం ఇస్తుంది. ఈ విశ్వవిద్యాలయం కేవలం "శిక్షణ" ఇవ్వడమే కాదు వారిని "జ్ఞానవంతులుగా" రూపొందిస్తుంది. ఇందులో విద్యాభ్యాసం చేసే వారు సుదూర ప్రాంతాల నుంచి వచ్చిన వారు. అణగారిన వర్గాలకు చెందిన వారు కూడా ఉంటారు. జె.ఎన్.యు.లో సకల విషయాలను యదేచ్ఛగా చర్చించుకునే అవకాశం ఉంటుంది. అక్కడ జ్ఞానం అందించడంతో పాటు  సమాజంలో మానవతా విలువలను, నైతిక విలువలను పరిరక్షించడం కూడా అలవరుస్తారు. ఇందులో దశాబ్దాలుగా సురక్షితమైన వాతావరణం ఉంటుంది. ఇది ఒక విశ్వవిద్యాలయం నడపడానికి అత్యవసరమైంది.

ఈ విశ్వవిద్యాలయం విద్యార్థులకు నాణ్యమైన విద్య అందుబాటులో ఉంచడానికి ఉద్దేశించింది. విద్య మరింత వాణిజ్య సరుకుగా మారకుండా నివారిస్తుంది. అందుకే జె.ఎన్.యు.లో ఫీజులు పెంచడాన్ని రెండు నెలలుగా విద్యార్థులు నిరసిస్తున్నారు. అయితే ఈ వివాదాన్ని పరిష్కరించడానికి విశ్వవిద్యాలయ పాలకమండలి ఏ ప్రయత్నమూ చేయలేదు. గతంలోనూ చాలా సార్లు జె.ఎన్.యు. విద్యార్థులపై "జాతి వ్యతిరేకులు" అన్న ముద్ర వేశారు. వారు అక్కడ తేరగా తింటున్నారు అని ఆరోపించారు. ఆ విశ్వవిద్యాలయం సామాజిక-మేధా శక్తిని చిన్న చూపు చూశారు, తూలనాడారు. విశ్వవిద్యాలయం భద్రతకోసం ఏటా రూ 17 కోట్లు కేటాయించినా కిరాతకమైన దాడి జరగడానికి అవకాశం కల్పించారు. దాడిని నిరోధించడానికి ఏ ప్రయత్నమూ చేయలేదు. అక్కడి గ్రంథాలయం కోసం కేటాయించిన డబ్బుకన్నా భద్రత కోసం వెచ్చిస్తున్నది నాలుగు రెట్లు ఎక్కువ. పాత భద్రతా సిబ్బందిని మార్చి మాజీ సైనికులను, సాయుధ దళాల వారిని భద్రత కోసం నియమించారు. తమకు వత్తాసు పలికే అధ్యాపకులను నియమించారు. అక్కడ ఆధిపత్య ధోరణి కొట్టొచ్చినట్టు కనిపించింది.

అక్కడ జరిగిన దాడికి సంబంధించిన చిత్రాలను చూస్తే ఈ దాడి చేస్తున్న ఏబీవీపీ వారికి విద్యార్థులు, కొందరు అధ్యాపకులు మద్దతు తెలుపుతున్నట్టుగా స్పష్టమైంది. ఈ దాడి చూస్తే ఏ దాడి చేసినా తమకు శిక్ష పడదన్న ధీమా, అధికారులే దాడిని సమర్థించిన వైనం స్పష్టంగా కనిపించింది. ఈ వ్యవహారమంతా చూస్తే ప్రస్తుతం అధికారంలో ఉన్న ప్రభుత్వం సంప్రదింపులకు బదులు ఘర్షణ ధోరణిని, ప్రతికూల వైఖరిని అనుసరిస్తున్నట్టు స్పష్టమైపోతోంది. తమ వాదన నుంచి ఒక్క అంగుళం కూడా బెసగని ధోరణి వారు ఎంత కిరాతకంగా వ్యవహరిస్తున్నారో అర్థం అవుతోంది. తాము నిర్వహించే సంస్థలోనే దాడులను ప్రేరేపించారు.

జె.ఎన్.యు.లో జరిగిన వ్యవహారం గమనిస్తే పథకం ప్రకారం పనిగట్టుకుని ఈ దాడులకు దిగినట్టు తేలుతోంది. "టుక్డే టుక్డే గ్యాంగు"లను శిక్షించాలని 2019 డిసెంబర్ లో దిల్లీలో జరిగిన ఒక సమావేశంలో కేంద్ర హోం మంత్రి అమిత్ షా బాహాటంగా పిలుపు ఇవ్వడం లాంటి సంఘటనలు ఈ దాడులకు నేపథ్యంగా పని చేశాయి. దాడికి దిగిన వారు నిజానికి సమాజాన్ని ఛిన్నాభిన్నం చేయడానికి ప్రయత్నిస్తున్న వారు ఎవరు అని ఆలోచించలేదు. దాడి జరుగుతున్న సమయంలో ఆ విశ్వవిద్యాలయం దగ్గరే భారీ సంఖ్యలో పోలీసు బలగాలు ఉన్నా హింసాకాండ చెలరేగుతుంటే ఏమీ పట్టనట్టు నిర్లిప్తంగా ఉండి పోయారు. ముసుగులు వేసుకుని దాడికి దిగిన వారు బలాదూరుగా వెళ్లిపోతూ ఉంటే మౌన ప్రేక్షకుల్లా ఉండిపోయారు. ఇది పోలీసుల అసమర్థకు, నిష్క్రియాపరత్వానికి పరాకాష్ఠ.

మరో వేపు పౌరసత్వ సవరణ చట్టానికి వ్యతిరేకంగా దేశవ్యాప్తంగా నిర్భయంగా, ధైర్యంగా ప్రజలు ప్రతిఘటిస్తూనే ఉన్నారు. సాధారణంగా ఇంతవరకు రాజకీయాలతో ప్రమేయం లేకుండా ఉన్న విశ్వవిద్యాలయాల వారు కూడా నిరసనోద్యమంలో చురుకుగా పాల్గొంటున్నారు. ఈ ఉమ్మడి స్ఫూర్తి ఆశాజనకంగా ఉంది. నిరసన తెలియజేస్తున్న వారి వాదనలో బలం ఉన్నందువల్ల కొత్త వర్గాల మద్దతు, సంఘీభావం అందుతోంది. వారి నిరసన హాస్యస్ఫోరకంగానూ ఉంటోంది. తల్లిదండ్రులు కూడా తమ పిల్లలతో పాటు నిరసనలో భాగస్వాములు అవుతున్నారు. "హం దేఖేంగే" పాటను పోలీసులు “చూస్తూ ఊరుకుంటాం” అని అర్థం చేసుకుంటునారనిపిస్తొంది. అందుకే దౌర్జన్య కాండ జరుగుతున్నా మిన్నకున్నారనిపిస్తోంది. అయితే అహంకారపూరితంగా, వ్యతిరేకభావానికి అలవాటు పడిన ప్రభుత్వానికి ఆ పాట అంతరార్థం తలకెక్కుతుందని అనుకోలేం. అందుకే ఆ పాట పాడే వారిని అణగదొక్కుతున్నారు.

జె.ఎన్.యు.లో జరిగిన దాడులు ఇతర విశ్వవిద్యాలయాల్లో, ముఖ్యంగా జామియా మిలియా, అలీగఢ్ ముస్లిం విశ్వవిద్యాలయంతో పాటు ఉత్తరప్రదేశ్ లాంటి చోట్ల జరిగిన దాడులకు పొడిగింపు మాత్రమే. అయితే అంతకు ముందు రాజ్య వ్యవస్థ యంత్రాంగం విద్యార్థులపై కాల్పులు జరపడానికి, గ్రంథాలయాల మీద దాడి చేయడానికి వెనుకాడలేదు. తాజాగా జె.ఎన్.యు.లో దాడికి దిగిన మూకలు 2016లో దేశ వ్యతిరేక నినాదాలు చేసిన బృందాల్లాగే ఉన్నాయి. వారెవరో ఇంతవరకు కనిపెట్టలేదు. ఇప్పుడూ అదే జరిగింది. కానీ జె.ఎన్.యు.ను అపఖ్యాతి పాలు చేసే ప్రయత్నం మాత్రం తీవ్రంగా జరుగుతోంది.

అయితే దౌర్జన్యానికి దిగుతున్న వారు ముసుగులేసుకున్నా వారు ఎవరో ప్రజలు గమనిస్తూనే ఉన్నారు. దాడులకు దిగుతున్న వారికి ఇసుమంత అసమ్మతినైనా భరించే ఓపిక లేదు. అందుకే ఇతర చోట్ల కన్నా విశ్వవిద్యాలయాల్లో నిరసనలు ఎక్కువగా పెల్లుబుకుతున్నాయి. ఇవి ప్రభుత్వానికి సవాలుగా పరిణమిస్తున్నాయి.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top