ISSN (Print) - 0012-9976 | ISSN (Online) - 2349-8846

విద్యా విధానంపై మరో తుపాను

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

జూన్ నెలలో దిల్లీలో ధూళి తుపాన్లు వస్తూ ఉంటాయి. కానీ తాజా తుపాను అర్థ శతాబ్దం కింద పరిష్కారమైన వ్యవహారాన్ని మళ్లీ రేపింది. సుదీర్ఘ కాలం పాటు జరిగిన ఎన్నికల తరవాత ఎన్నికల ఫలితాల స్వరూపాన్ని విశ్లేషించడానికి ఆట్టే సమయం చిక్కలేదు. ఎందుకంటే నూతన విద్యా విధాన ముసాయిదాలో మళ్లీ త్రిభాషా సూత్రాన్ని ప్రస్తావించారు. దీనిపై తమిళనాడు నుంచి అభ్యంతరం వ్యక్తం కాగానే మానవ వనరుల శాఖ మంత్రిత్వ శాఖ త్రిభాషా సూత్రానికి సంబంధించిన వాక్యాలను ముసాయిదా నుంచి తొలగించింది. కొత్త తరం వారు త్రిభాషా సూత్రం ఇంకా సజీవంగానే ఉందని గ్రహించాలి.

ఒక్కొక్క సారి పాత పత్రాలు చాలా తాజాగా కనిపిస్తాయి. తాజాగా ప్రతిపాదించిన ముసాయిదా కన్నా పాత పత్రమే మరింత తాజాగా కనిపిస్తుంది. కొత్త ప్రభుత్వం ఏర్పడిన వారం రోజుల్లోగానే నూతన విద్యా విధానం ముసాయిదా పత్రం అందరి దృష్టినీ ఆకర్షించింది. త్రిభాషా సూత్రం అన్న ప్రతిపాదన మొట్ట మొదటి సారి డి.ఎస్. కొఠారీ అధ్యక్షతన 1964-66 మధ్య ఏర్పడిన విద్యా కమిషన్ నివేదికలో ప్రస్తావనకు వస్తుంది. ఆ కమిషన్ లో సభ్య కార్య దర్శి అయిన జె.పి. నాయక్ కు దేశమంతటా వివిధ ప్రాంతాలలో విద్యా వ్యవస్థలో ఉన్న సమస్యలు బాగా తెలుసు. ఆ కమిషన్ నివేదిక ముసాయిదాను రూపొందించింది నాయకే. విద్యా రంగంలో త్రిభాషా సూత్రాన్ని కేంద్ర సలహా మండలి 1956లో మొట్ట మొదటి సారి ప్రస్తావించిందని, దీనిని 1961లో ముఖ్య మంత్రుల సమావేశంలో సులభతరం చేశారని ఈ నివేదికలో తెలియజేశారు. ఇలా సులభతరం చేయడం విద్యా సంబంధ అంశాలకన్నా ఎక్కువగా రాజకీయ సంబంధ వ్యవహారమేనని కొఠారీ కమిషన్ నివేదికలో తెలియజేశారు.

కొఠారీ కమిషన్ నివేదికలో భాషకి సంబంధించిన విభాగంలో విద్యా రంగ వ్యవహారాలకు, రాజకీయ అభిప్రాయాలకు మధ్య సమతూకం పాటించడానికి ఎక్కువ శ్రమ పడ్డారు. ఆ నివేదికలో ఇలా రాశారు: "త్రిభాషా సూత్రం ఆచరణలో అనేక ఇబ్బందులను ఎదుర్కుంది. అది అంతగా విజయం సాధించలేదు. ఈ పరిస్థితికి అనేక అంశాలు కారణమయ్యాయి. ఇందులో మొదటిది పాఠశాల స్థాయిలో భాషా బోధన భారం అయిపోతోందన్న అభిప్రాయం వ్యక్తమైంది. హిందీ మాట్లాడే ప్రాంతాలలో అదనంగా మూడవ భాష నేర్చుకోవడానికి ప్రోద్బలం కరవైంది. హిందీ మాట్లాడని ప్రాంతాలలో హిందీ నేర్చుకోవడంపట్ల వ్యతిరేకత వ్యక్తమైంది. రెండవ, మూడవ భాష బోధనకు అధిక మొత్తంలో డబ్బు ఖర్చు పెట్టవలసి వచ్చింది. ఈ భాషల అధ్యయనంవల్ల అవాస్తవిక పరిస్థితివలా విద్యార్థులకు పెద్ద ప్రయోజనం కలగలేదు. ఆరో తరగతి నుంచి పది, పదకొండో తరగతి దాకా మూడు భాషలు నేర్పించాలనుకున్నారు. మూడో భాషకు సంబంధించి విద్యార్థులకు కలిగిన మేలేమీ లేదు." (పేజీ 333, పారా 8.32). వివిధ ప్రత్యామ్నాయాలను, ఒక సభ్యుడు ఇచ్చిన అసమ్మతి పత్రాన్ని పరిశీలించిన కొఠారీ కమిషన్ చివరకు ఇలా చెప్పింది. "ప్రాథమిక పాఠశాల స్థాయిలోనే మూడు భాషలు అభ్యసించడంవల్ల విద్యార్థి మాతృ భాషపై పట్టు సంపాదించడాన్ని ప్రభావితం చేస్తుంది. ఇది విద్యార్థి మేధో అభివృద్ధికి కూడా ఆటంకం కలిగిస్తుంది. అందువల్ల సమీప భవిష్యత్తులో మాతృ భాష నేర్చుకోవడంపై ఎక్కువ శ్రద్ధ తీసుకోవాలి. అదనపు భాష నేర్చుకోవడం మీద బలవంతం ఉండకూడదు." (పేజీ 340, పేరా 8.41).

ఇక 21వ శతాబ్దం రెండవ దశాబ్దం నాటి పరిస్థితిని చూద్దాం. విద్యా కమిషన్ దృష్టితో చూస్తే విద్యా వ్యవస్థ గుర్తుపట్టడానికి వీలు లేనంతగా మారిపోయింది. కొఠారి, నాయక్ ఊహించినట్టుగా విద్యా విధానం ప్రస్తుతం లేదు. ప్రభుత్వ పాఠశాలల మీద తల్లిదండ్రులకు నమ్మకం లేనందువల్ల ప్రైవేటు రంగంలో పాఠశాలలు తామర తంపరగా పెరిగిపోయాయి. తమ పిల్లలను ఇంగ్లీషు మాధ్యమంలో చదివించాలన్న ఆకాంక్ష తల్లిదండ్రుల్లో ప్రబలి పోయింది. ఉపాధ్యాయుల కొరత కూడా ఉంది. ఉపాధ్యాయుల నియామకంలో సమస్యలు తలెత్తాయి. ఉపాధ్యాయులకు శిక్షణ ఇవ్వడం కూడా వాణిజ్యపరమై పోయింది. ఇవన్నీ కొఠారీకి, నాయక్ కు, ఆ కమిషన్ సభ్యులకు దిగ్భ్రాంతి కలిగించే అంశాలే. ఈ పరిణామాలను వారు నమ్మ లేరు కూడా. విద్యా రంగంలో ప్రణాళికలు రూపొందించడంలో ఎలా వ్యర్థ ప్రయత్నంగా మిగిలిపోతుందో కూడా వారు గమనించగలరు. వారు విద్యా రంగంపై నివేదిక రూపొందించిన సమయంలో ప్రభుత్వ కేంద్రకంగా విధానం రూపొందించాలి కనక వారు రాజకీయ లక్ష్యాలను దృష్టిలో ఉంచుకోక తప్ప లేదు.  మార్కెట్ ప్రయోజనాలు అప్పుడు నామ మాత్రమైనవే. ఇప్పుడు పరిస్థితి పూర్తిగా తిరగబడింది. మార్కెట్ ఒత్తిడులు ఇప్పుడు కేంద్ర స్థానంలో ఉన్నాయి. రాజకీయ లక్ష్యాలు కేవలం పైకి చెప్పే మాటల మేరకే ప్రధానమైనవి. వీటిని మీడియాలో రకరకాలుగా వ్యక్తం చేస్తారు. హిందీని ప్రోత్సహిస్తామన్నది కేవలం బయటికి చెప్పే అంశమే తప్ప అందులో పసలేదు. త్రిభాషా సూత్రంలో హిందీ నిర్వర్తించే పాత్ర గురించి చెప్తూ నూతన విద్యా విధానం ముసాయిదా పత్రంలో జాతీయత మీద విశ్వాసం వ్యక్తం చేశారు. హిందీని వ్యతిరేకించే వారు ముందు ఊహించిన వర్గాలే. హిందీని వ్యతిరేకించడం ఎప్పుడో పరిష్కారం అయిన సమస్యను మరింత తాజాగా ప్రస్తావించడమే. 

చిన్నప్పటి నుంచే ఇంగ్లీషు మాధ్యమం మీద ఆసక్తి పెరుగుతోందని ఇటీవల అనేకానేక అధికారిక ప్రకటనల్లో తెలియజేశారు. ప్రస్తుత నూతన విద్యా విధాన ముసాయిదాలో కూడా ఇదే విషయం చెప్పారు. "సాధ్యం" అయిన చోట మాతృ భాషలో విద్యా బోధన జరగాలని పేర్కొన్నారు. ఈ నిబంధన ఇతర అభిప్రాయాలను మన్నిందడానికి ఉద్దేశించింది. విద్యా విధానంలో లోపాలున్నా అది సువ్యవస్థీకృతమైంది. విద్యా విధానం పై  ఒకప్పటి, ఇప్పటి కులీన వర్గాల అభిప్రాయాల వ్యక్తీకరణే. హిందీ నేర్చుకోవడం అంటే ఒకప్పుడు జాతీయ భావనతో ముడిపడి ఉండేది. ఇప్పుడు అది కాస్త మసకబారింది.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top