ISSN (Print) - 0012-9976 | ISSN (Online) - 2349-8846

కేరళ విపత్తులో వ్యక్తమైన దృఢ దీక్ష

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

ఇటీవల కేరళలో వరదలు ముంచెత్తి మహా విపత్తు ఎదురైనప్పుడు ప్రజల స్పందన మూడు దశల్లో కనిపించింది. మొదటిది సమాజంలోని వివిధ వర్గాల వారు ప్రాంతీయ, జాతీయ సరిహద్దులను లెక్క చేయకుండా మానవతా దృష్టితో స్పందించారు. ఈ స్పందన ఎవరి ప్రోద్బలంతోనో వచ్చింది కాదు. వ్యక్తుల నుంచి, దేశ విదేశాలలోని వారి నుంచి కేరళకు అందుతున్న, ముఖ్యంగా స్వచ్ఛంద సంస్థలనుంచి అందుతున్న సహాయం అపూర్వమైంది. ఇది ఏ రకమైన సరిహద్దులకూ లోబడింది కాదు. మానవత్వ విలువలే దీనికి కారణం. దేశంలోని, ప్రపంచంలోని వనరులను సమకూర్చి సహాయపడుతున్నారు. ఈ మొదటి దశ స్పందన మూడు కారణాలవల్ల నైతికంగా ఉత్కృష్టమైంది. మొట్టమొదట అది నిందాపనిందలకు అతీతమైంది. వ్యక్తులు తమ సంఘీభావం తెలియజేయడానికి తమ ధనం, వస్తువులు దానం చేశారు. విధ్వంసకరమైన వరద మిగిల్చిన కష్టాల బారిన పడిన వారిని ఆదుకోవడానికి సహాయం అందించారు. నైతికంగా చేసే ఈ సహాయం నిర్దిష్టమైన దిశా నిర్దేశం కోసం, మార్గ దర్శనం కోసం ఆగదు. అది మనిషికి ఉండే సహజాతమైన లక్షణం కారణాగానే ఏ మాత్రం జాప్యం లేకుండా కొనసాగుతుంది.

రెండవ దశ సహాయం ఇలాంటిది కాదు. ఇందులో బోలెడు విమర్శలు ఉంటాయి. పరిస్థితిని సవ్యంగా ఎదుర్కోలేదన్న ఆరోపణలు ఉంటాయి. అందుకే మహా విపత్తును ఎదుర్కున్న కేరళ ప్రభుత్వం మీద విమర్శలు వెల్లువెత్తాయి. కేరళ విషయంలో రెండు రకాల వారు ఈ విమర్శలు గుప్పించారు. పర్యావరణ పరిరక్షకులు, కేరళ రాజకీయ వ్యవస్థతో, ఆర్థిక వ్యవస్థతో సంబంధం ఉన్న వారు ఈ విమర్శలకు దిగారు. పర్యావరణ శాస్త్రవేత్తలు ఎప్పటి నుంచో హెచ్చరిస్తున్నప్పటికీ అక్కడి ప్రభుత్వాలు పట్టించుకోలేదని దుయ్యబట్టారు. కానీ కేరళ అభివృద్ధి పంథాలో ఉన్న రాజకీయాల కారణంగా, విదేశాలకెళ్లిన వారు స్వదేశానికి పంపే డబ్బు ఆధారంగా అభివృద్ధి కొనసాగే ఆ రాష్ట్రంలో అభివృద్ధి అత్యంత ప్రీతిపాత్రమైంది కనక కేరళ నుంచి ఇతర ప్రాంతాల నుంచి వచ్చిన హెచ్చరికలను ఖాతరు చేయలేదు. వరదలకు గురైన ఇతర ప్రభుత్వాలకు కూడా అందినా అభివృద్ధి మాయలో పడి వాటిని పక్కన పెట్టారు. చెత్త బుట్ట పాలు చేసి ఉండకపోవచ్చు. అందువల్ల అభివృద్ధి కాంక్ష ఈ హెచ్చరికలను ఖాతరు చేయదు. అయితే దీనివల్ల మానవాళికి మహా విపత్తు ఎదురు కాక తప్పదు. రెండవ దశ విమర్శ యాదృచ్చికమైంది కాదు. అందులో శాస్త్ర సత్యం ఉంది. అందుకని ఈ హెచ్చరికలు చేసిన వారు తప్పంతా ప్రకృతిపై తోసేయకుండా ప్రభుత్వాలను బాధ్యులను చేస్తారు. మానవ స్వప్రయోజనాలు కారణం అంటారు. ఈ ప్రయోజనాలను పరిరక్షించే వ్యవస్థల తప్పంటారు.

కేరళ ఆర్థిక వ్యవస్థతో ప్రమేయం ఉన్న వారు మహా విలయం వల్ల ఆర్థిక వ్యవస్థ మీద పడే ప్రభావాన్ని గురించి ఆందోళన వ్యక్తం చేస్తారు. ఉత్పాదక రంగాలు, వస్తు సేవలను అందజేసే రంగాల విచ్చలవిడి తనాన్ని తప్పు పడతారు. ఈ విపత్తు కేరళలోని బ్యాంకింగ్, బీమా వ్యవస్థలకు, గృహ నిర్మాణ రంగానికి, పర్యాటనకు, వ్యవసాయ రంగానికి, మౌలిక ఉత్పాదనకు తీరని నష్టం కలిగిస్తుందని ఆర్థికవేత్తలు ఆందోళన వ్యక్తం చేశారు. సాంప్రదాయిక పరిశ్రమల మీద కూడా ఈ విపత్తు ప్రభావం తీవ్రంగా ఉంటుంది. ప్రాథమిక అంచనాల ప్రకారం వరదల వల్ల రూ. 20, 000 కోట్ల మేర నష్టం జరిగింది. నిర్దిష్టమైన పద్దతిలో అంచనా వేస్తే ఇది మరింత పెరగవచ్చు. ఒక్క పర్యాటక రంగానికే రూ. 30, 000 కోట్ల నష్టం జరిగిందంటున్నారు. ఈ రంగంలో 14 లక్షల మంది పని చేస్తున్నారు. కేరళ స్థూల ఉత్పత్తిలో ఈ రంగం వాటా పది శాతం ఉంటుంది. ఈ విపత్తువల్ల స్వల్పకాలికంగా వినియోగం తగ్గుతుంది. ముఖ్యంగా ఓనం పండగ సందర్భంగా వినియోగంపై తీవ్ర ప్రభావం ఉంటుంది. పండగ సందర్భంగా వాహనాల కొనుగోలు కూడా బాగా తగ్గుతుంది. జీవనోపాధికి ఎంత నష్టం కలిగిందో అంచనా వేయాల్సి ఉంది.

మూడవ దశలో స్పందన కొంచెం ఆలస్యంగా రావడం సహజమే. అయితే ఈ స్పందన శాస్త్రీయమైంది కాదు. దైవాగ్రహం వల్లే ఇంత నష్టం కలిగిందంటున్నారు. ఈ విమర్శ చేసిన వారు మితవాద రాజకీయాలు అనుసరించే వారే. వారి మద్దతుదార్లే. వీరికి కేరళ ప్రభుత్వంపై నిందమోపాలన్న తహ తహ ఎక్కువ. కానీ కేరళ ప్రభుత్వం మీద విమర్శలు ఎక్కుపెట్టలేక పోయారు. అన్యాపదేశంగా శబరిమల ఆలయంలోకి మహిళల ప్రవేశాన్ని కేరళ ప్రభుత్వం సాధ్యం చేసినందువల్లే ఈ మహావిపత్తు సంభవించిందని వాదించారు. అయితే వీరు చూపిన కారణం 1934 లో నేపాల్-బిహార్ లో భీకరమైన భూకంపం సంభవించినప్పుడు మహాత్మా గాంధీ చేసిన వ్యాఖ్యలవంటిదీ కాదు. బిహార్ లోని అగ్రవర్ణాల వారు అంటరానితనాన్ని పాటించినందువల్లే దేవుడు ఆగ్రహించాడని గాంధీ అన్నారు. గాంధీ దేవుడిని ఆసరాగా చేసుకుని సామాజిక బాధ్యత గుర్తు చేయాలనుకున్నారు. అశేష ప్రజానీకాన్ని అగ్రవర్ణాల వారు మనుషులుగా చూడలేదన్నది గాంధీ ఆంతర్యం. కానీ ఇప్పుడు మితవర్గాల ప్రకారం కేరళ విపత్తు దేవుడు ఆగ్రహించింది గాంధీ చెప్పినట్టు తోటి మానవుల విషయంలో అగ్రవర్ణాల వారి వ్యవహార సరళిలా కాకుండా దేవాలయాలలో లింగ వివక్ష కొనసాగి తీరాల్సిందే అన్న దృష్టితోనే నిందకు దిగారు.

ఈ మూడు దశల్లో వచ్చిన స్పందనను పక్కనబెట్టి విపత్తు సంభవించిన తర్వాత సహాయ పునరావాస కార్యక్రమాలు చేపట్టడంలో కేరళ పాలనా యంత్రాంగం, రాష్ట్ర అధికారులు, సాహసోపేతమైన రీతిలో బాధితులను కాపడిన వైమానిక దళాల వారు, జాతీయ విపత్తుల నివారణ, సహాయ కార్యకలాపాల వ్యవస్థ, వైద్య బృందాలు అవి ఆ రాష్ట్రానికి చెందినవైనా, దేశంలోని ఇతర ప్రాంతాలకు చెందినవైనా మహత్తరంగా పని చేశాయి. జాలర్లకు ఉన్న నైపుణ్యాన్ని వరదల్లో చీకుకున్న వారిని రక్షించడానికి వినియోగించిన తీరు చాలా గొప్పగా ఉంది. ఇంతటి మహా విపత్తు సంభవించినప్పుడు కేరళ వాసులు ఏ పరిమితులకూ లోబడకుండా తమ పట్టుదలను, సమైక్యతను అద్భుతంగా ప్రదర్శించారు.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top