ISSN (Print) - 0012-9976 | ISSN (Online) - 2349-8846

ద్రవ్యోల్బణ నియంత్రణే అభివృద్ధి మంత్రమా!

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

వరుసగా రెపో రేటును 6 నుండి 6.25 శాతానికి పెంచడం ద్వారా, మళ్లీ 6.50 శాతానికి పెంచడం ద్వారా రిజర్వ్ బ్యాంక్ ఆఫ్ ఇండియా (ఆర్బీఐ) స్వీయ ప్రచారంతో కూడిన ద్రవ్యోల్బణ అంచనాలను మరో పావ్లోవియన్ ప్రతిస్పందనలో చూపించింది. రివర్స్ రెపో రేటును మరో పావు శాతం పెంచింది. బ్యాంకులకు ఆర్బీఐ అందించే ద్రవ్య నగదు నిలవలను పెంచడం దీని లక్ష్యం. కానీ దీని వల్ల రుణాలు తీసుకునే వారి మీద భారం పెరుగుతుంది. తప్పనిసరిగా పెట్టుకున్న లక్ష్యాలకు రిటైల్ ద్రవ్యోల్బణాన్ని పరిమితం చేయడం ఆర్బీఐ మరో లక్ష్యం.

          జాతీయ ఆర్థిక వ్యవస్థ నిర్వహణలో ఆర్థిక ద్రవ్యపరమైన రెండు శక్తివంతమైన ఉపకరణాలను ఉదార ఆర్ధిక వ్యవస్థ చట్రంలో బిగించాలని ప్రయత్నించడం మాత్రమే సవ్యమైన పనిగా తోచదు.  అందువల్ల అభివృద్ధి పెంచడానికి, ఉపాధి కల్పనకు ఈ చర్యలు దోహదం చేయవు. సామాజిక అసమానతలను తగ్గించడానికి కూడా తోడ్పడవు. ఈ కారణంగా సామాజిక రంగానికి నిధుల కేటాయింపు తగ్గిపోయింది. సామాజిక రంగంలో మన దేశం ఇతర దేశాలతో పోలిస్తే చాలా వెనుకబడి ఉంది. సహజంగానే అసమానతలు మరింత పెరిగాయి.

ఒకే వడ్డీ విధానాన్ని అనుసరించడంవల్ల ఆర్బీఐ అనుసరించిన  విధానం ద్రవ్యోల్బణాన్ని తగ్గించే క్రమంలో పార్లమెంటు నిర్దేశించినట్టుగా ద్రవ్యోల్బణాన్ని 4 శాతం నుంచి 2 శాతానికి అటో ఇటోగా ఉండాలని మాత్రమే ప్రయత్నించారు. ఆర్థిక విధానాన్ని ఇలా పరిమితం చేయడాన్ని గతంలోని ఆర్బీఐ గవర్నర్లందరూ వ్యతిరేకించారు. ఎందుకంటే కేవలం ద్రవ్యోల్బణ నియంత్రణ మీద దృష్టి పెడితే అభివృద్ధి లక్ష్యాలను పట్టించుకోని పరిస్థితి ఏర్పడుతుంది. ద్రవ్యోల్బణం పెరగడానికి సరఫరాలో ఉన్న సమస్యలే ప్రధాన కారణం. ఈ విషయం ఆర్బీఐ చేతిలో ఉన్నది కాదు. అందువల్ల ఆర్థిక విధాన రూపకల్పన ప్రక్రియ బలహీనంగా తయారైంది. రెపో రేట్లు మార్చడంవల్ల వినియోగదార్ల ద్రవ్యోల్బణ రేటు తగ్గిందన్న ఆర్బీఐ వాదనను అనేక స్వతంత్ర అద్యయనాలు ఆమోదించలేదు.

వినియోగదార్ల ద్రవ్యోల్బణం, టోకు ధరల ద్రవ్యోల్బణం, స్థూల జాతీయ ఉత్పత్తి లో ద్రవ్య సంకోచం మొదలైనవన్నింటి ప్రభావం దీనితో సంబంధం ఉన్న భిన్న వర్గాలు అంటే వినియోగదార్లు, ఉత్పత్తిదార్ల మీద విభిన్నమైన ప్రభావం కనబరుస్తుంది. దీనికి మంచి ఉదాహరణ గుజరాత్ లోని పాడిపరిశ్రమాభివృద్ధి. పాల సేకరణ ధర పెంచడంవల్ల పాలు ఉత్పత్తి చేసే వారికి ఉత్పత్తి పెంచడానికి ప్రోత్సాహం ఇచ్చింది. వివిధ వినియోగ వస్తు సేవల ధరలను బట్టి చూస్తే ద్రవ్యోల్బణాన్ని 4 శాతానికి పరిమితం చేయాలన్న లక్ష్యం చాలా తక్కువే. "వినియోగదార్ల ద్రవ్యోల్బణ రేటును 4 శాతానికి తగ్గించాలని పార్లమెంటు భావించింది కనక మేం ఆ లక్ష్యంతోనే పని చేస్తున్నాం" అని ఆర్బీ గవర్నర్ ఇటీవల పత్రికా విలేకరుల సమావేశంలో మాట్లాడుతూ చెప్పారు.

కేవలం ద్రవ్యోల్బణం తగ్గింపు మీదే దృష్టి పెట్టాలా లేక అభివృద్ధిని పెంపొందించడానికి సమగ్ర వ్యూహం అనుసరించాలా అన్న విషయాన్ని ఆర్బీఐ, ప్రభుత్వం కూడా ఆలోచించాలి. ఆర్థిక వ్యవస్థలో పొదుపు పెంచడంపై ఆర్బీఐ దృష్టి సారించాలి. ఇది అత్యవసరం. బ్యాంకుల్లో డబ్బు వాస్తవంగా నిలవ చేసే వారి సంఖ్య పెరగాలి. జనం డబ్బు పొదుపు చేయడానికి ఇదే ఇంతవరకు ఉత్తమ మార్గం. చిన్న మొత్తంలో పొదుపు చేసే వారికి ప్రోత్సహకాలు ఇవ్వాలి. పొదుపు చేసే వారు ఉన్నప్పటికీ వారి విషయంలో ద్రవ్య విధానాల ప్రభావం ఉండడం లేదు. వడ్డీ రేట్లు కఠినంగా ఉండాలన్న గత విధానాలను అనుసరించాలని కాదు. అదే ఏకైక లక్ష్యం కాకూడదు. ఒక ఏడాది కోసం పొదుపు చేసే వారికి గత సంవత్సర ద్రవ్యోల్బణంతో పోలిస్తే కనీసం 2 శాతం కన్నా ఎక్కువ వడ్డీ సమకూరాలి. పొదుపు ఖాతాల, పోస్టు ఆఫీసుల్లో పొదుపు లాంటివి కాలానుగుణంగా మారాలి. అప్పుడు బ్యాంకులకు డబ్బు సమకూరే అవకాశం పెరుగుతుంది.

అభివృద్ధి కార్యకలాపాలకు రుణాలు ఇచ్చే విషయానికి వస్తే ప్రభుత్వం ద్వంద్వ బాలెన్స్ షీట్ల సమస్య, బ్యాంకుల్లో పేరుకుపోతున్న నిరర్థక ఆస్తుల వ్యవహారంతో సతమతం అయిపోతున్నట్టు కనిపిస్తోంది. సంఘటిత రంగం కాని రంగాన్ని బ్యాంకుల వ్యవస్థ ఆర్థిక వ్యవస్థలో భాగంగా పరిగణించడక పోవడం మరో సమస్య. ఆర్థిక వ్యవస్థలోని వివిధ అనియత రంగాలలో పని చేస్తున్న వారు బ్యాంకింగ్ వ్యవస్థ పరిధిలో చాలా వరకు లేరు. మన దేశంలో ప్రైవేటు బ్యాంకులు రుణాలు ఇవ్వడం కేవలం 52 శాతం మాత్రమే ఉంది. మిగతా దేశాలతో పోలిస్తే ఇది చాలా తక్కువ. ఉత్పాదక వ్యవహారాలకు రుణ సదుపాయం కల్పించే అంశాన్ని బ్యాంకింగ్ వ్యవస్థ సాకల్యంగా ఆలోచించాలి. అభివృద్ధికి తోడ్పడే ఆర్థిక వ్యవస్థలను మూసి వేయడంవల్ల పారిశ్రామికీకరణ క్రమం కుంటువడింది. దీనికి ప్రత్యామ్నాయ ఏర్పాటు చేస్తామని ఆర్బీఐ ఏడాదిన్నర కిందే చెప్పినా అది ఇప్పటికీ సాకారం కానే లేదు. ఈ సమస్యకు పరిష్కారం కనుగొనడానికి చేసింది ఏమీ లేదు. ప్రైవేట్ రంగంలోని బ్యాంకేతర ఆర్థిక కంపెనీల మీదే ఎక్కువ శ్రద్ధ పెడ్తున్నారు. పరిశ్రమలకు దీర్ఘ కాలిక రుణాలు అందజేయడం ఈ ప్రైవేటు సంస్థలవల్ల అయ్యే పని కాదు. పారిశ్రామికీకరణకు ప్రభుత్వ రంగ దన్ను ఉండవలసిందే.

ఈ అంశాలను దృష్టిలో ఉంచుకుంటే ఆర్బీఐ, ప్రభుత్వం పట్టించుకోవలసిన అంశాలు చాలానే ఉన్నాయి. ఈ విషయంలో సమస్యలపై అధ్యయనం చేసి తగిన సిఫార్సులు చేయడానికి ఉన్నతాధికార కమిషన్ ఏర్పాటు చేయవలసిన అగత్యం ఉంది.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top