ISSN (Print) - 0012-9976 | ISSN (Online) - 2349-8846

ఆశ బారెడు అభివృద్ధి చారెడు

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

కేంద్ర గణాంకాల కార్యాలయం (సి.ఎస్.ఒ.) 2017-18 సవత్సరాల జాతీయ ఆదాయానికి సంబంధించి ముందస్తు అంచనాలు విడుదల చేసింది. అయితే గత నాలుగు సంవత్సరాల కాలంతో పోలిస్తే ప్రస్తుతం ఆర్థిక వ్యవస్థ పురోగతి చాలా మందకొడిగా ఉందని ఈ సంస్థ తెలియజేసింది. ఆరు నెలల నుంచి ఎనిమిది నెలల సమాచారం ఆధారంగా సి.ఎస్.ఒ. ఈ గణాంకాలు తయారు చేస్తుంది. వీటినే ఫిబ్రవరి ఒకటిన ప్రతిపాదించే కేంద్ర బడ్జెట్ రూపకల్పనకు వినియోగిస్తారు. ఏ యేటికాయేడు పెట్టుబడి పెరుగుతోందన్న ఆశావహ దృక్పథం ప్రభుత్వానికి ఉన్నప్పటికీ స్థూల జాతీయోత్పత్తి (జి.డి.పి.)లో భాగంగా స్థిర పెట్టుబడి సమకూరడం (జి.ఎఫ్.సి.ఎఫ్.) చాలా తక్కువగా ఉంది. ఈ జి.ఎఫ్.సి.ఎఫ్.నే ఆర్థికాభివృద్ధికి గీటురాయిగా పరిగణిస్తారు. 2011లో జాతీయ అకౌంట్స్ గణాంకాలు సేకరించడం ప్రారంభిమైన దగ్గర నుంచి ఇంత తక్కువ పెట్టుబడి ఎన్నడూ సమకూరలేదు. 2016-17లో పెద్ద నోట్లను రద్దు చేసినందువల్ల, 2017-18లో వస్తు సేవల పన్ను (జి.ఎస్.టి.) ప్రవేశపెట్టినందువల్ల ఈ అంచనాలు కూడా నికరమైనవి కాకపోవచ్చు.

ఈ సమాచారం ఆధారంగా ఏం ఆశించవచ్చు అని ఆలోచిస్తే ఈ అంచనాలు విడుదల చేసిన సంస్థ ఇచ్చిన సారాంశాన్ని పరిశీలించడం ఉపయుక్తంగా ఉంటుంది. 2017-18లో జి.డి.పి. వృద్ధి రేటు 6.5 శాతం ఉంటుందని ఈ సమాచారం ప్రకారం అంచనా. ఏయేటికాయేడు వృద్ధి రేటు దృష్టితో చూస్తే ఇది గత సంవత్సరం కన్నా తక్కువ. గత సంవత్సరం జి.డి.పి. వృద్ధి రేటు 7.1 శాతం ఉంది. నికర ధరల ఆధారంగా స్థూల విలువ చేర్చిన (జి.వి.ఎ.) పెరుగుదల 6.1 శాతం చొప్పున పెరగొచ్చు. గత సంవత్సర తాత్కాలిక అంచనాల ప్రకారం ఇది 6.6 శాతం ఉంది. జి.డి.పి.లో అంతర్భాగమైన ఇతర అంశాలను చూస్తే ఉత్పత్తులపై నికర పన్నులు జి.ఎస్.టి. కారణంగా గత ఏడాదిలో ఉన్న 10.9 శాతం కన్నా తక్కువ ఉండవచ్చు.

అనేక మందికి ఉపాధి కల్పించే వ్యవసాయరంగ అభివృద్ధి కూడా గత సంవత్సరం కన్నా తక్కువ ఉండే సూచనలే ఉన్నాయి. జి.వి.ఎ. సమాచారం ఆధారంగా ఈ అంచనాకు వచ్చారు. గత కొద్ది సంవత్సరాలతో పోలిస్తే వ్యవసాయరంగ అభివృద్ధి మందకొడిగా ఉండబోతోంది. జి.వి.ఎ. లో వ్యవసాయ రంగ వాటా ఈ కారణంగా తగ్గిపోతుంది. ఈ ఏడాది ఇది 14.6 శాతం ఉంది. జి.వి.ఎ. లో 40 శాతం వాటా ఉన్న సేవా రంగ అభివృద్ధి కూడా నామమాత్రంగా ఉండే సూచనలే కనిపిస్తున్నాయి. అయితే గత ఏడాదికన్నా కొద్దిగా మెరుగ్గా ఉండవచ్చు. వస్తూత్పత్తి రంగం ఎదుగుదల గత సంవత్సరం కన్నా తక్కువే ఉంటుందని అంచనా. పర్చేసింగ్ మేనేజర్స్ ఇండెక్స్ మాత్రం ఆశావహంగా ఉంది. ఈ ఏడాది ద్వితీయార్థంలో ఇది వృద్ధి చెందే అవకాశం ఉంది. ఎగుమతుల రంగంలో కూడా భారత్ పని తీరు అంతంత మాత్రంగానే ఉంది. గత అర్థ సంవత్సర కాలంలో ప్రపంచ వాణిజ్యం పెరిగినా భారత్ వాటాలో చెప్పుకోదగ్గ ఎదుగుదల లేదు.

సాధారణంగా సి.ఎస్.ఒ. గత సంవత్సర సవరించిన గణాంకాలను ఆధారం చేసుకుని ప్రస్తుత వృద్ధి రేట్లు లెక్క కడుతుంది. దీని వల్ల మొదటి పూర్తి సంవత్సర అంచనాలు జి.వి.ఎ. రేటు పెరిగినట్టు కనిపిస్తుంది. తర్వాత సవరించిన అంచనాలు తగ్గిపోతాయి. ఇప్పటి దాకా ఇదే ధోరణి కొనసాగుతోంది. కాని ప్రభుత్వం మాత్రం వృద్ధి రేట్ల అంచనాలు పెరుగుతాయని ఆశిస్తోంది. 2017-18 ద్వితీయార్థం ప్రథమార్థం కన్నా మెరుగ్గా ఉంటుందని ప్రభుత్వం ఆశిస్తోంది. ఇంతవరకు ఉన్న ఎన్.ఎ.ఎస్. సమాచార ధోరణి మాత్రం దీనికి అనుగుణంగా లేదు. ఆర్థిక కార్యకలాపాల ఇతర సూచికలు కూడా ఈ ఆశాభావానికి తగినట్టు లేవు. అయితే కొంత మంది విశ్లేషకులు మాత్రం ఈ అంచనాలను సవరించినప్పుదు ఆ గణాంకాలు పెరిగితే అది గణాంకాల ద్వారా పెంచిన అభివృద్ధి అవుతుందని అంటున్నారు. 2018 జనవరి ఆఖరు నాటికి సవరించిన అంచనాలు విడుదల అవుతాయి కనక 2016-17 వృద్ధి రేట్లను కూడా సవరించవలసి వస్తుంది కనక విశ్లేషకులు ఈ వాదన చేస్తున్నారు. కాని అదే సంవత్సరం పెద్ద నోట్ల రద్దు జరిగింది కనక ఈ గణాంకాలు తగ్గడానికే ఎక్కువ అవకాశం ఉంటుంది. కాని ఈ రేటు తక్కువ ఉన్నందువల్ల ఏయేటికాయేడు వృద్ధి రేటు పెరిగినట్టు గోచరిస్తుంది. అప్పటికి ఫిబ్రవరి ఆఖరు నాటికి రెండవ సవరించిన అంచనాలు వెలువడతాయి. పెద్ద నోట్ల రద్దు వల్ల స్థూల ఆర్థిక వ్యవస్థపై ప్రతికూల ప్రభావం ఏమిటో అర్థం అవుతుంది. కాని 2016-17 గణాంకాలను 2017-18 గణాంకాలను కూడా మరింత తగ్గించి వెలువరించినా ఆశ్చర్యపడవలసిన అగత్యం లేదు.

అభివృద్ధిని కొలవడానికి గణాంకాలు చెప్పే సమాచారాన్ని అలా ఉంచినా ఆర్థికాభివృద్ధికి మరో ముఖ్యమైన కొలమానం - పెట్టుబడులు. కాని జి.ఎఫ్.సి.ఎఫ్. కొలమానాల ప్రకారం తగ్గుముఖం పట్టాయి. ఏయేటికాయేడు లెక్కన చూసుకుంటే 2017-18లో ప్రైవేటు, ప్రభుత్వ వినియోగ వ్యయం కూడా తగ్గుతుంది. ఈ రెండు అంశాలు కూడా ఆర్థికాభివృద్ధికి ముఖ్యమైన కొలమానాలే. జి.డి.పి.లో జి.ఎఫ్.సి.ఎఫ్. 2011లో 34.3 శాతం ఉంటే 2017-18లో 29 శాతానికి తగ్గడం నిర్వివాదాంశం. పెట్టుబడులు అవసరమైన మేరకు పెరగడం లేదు. అందువల్ల 2004-05 నుంచి 2011-12 లో కనిపించిన అభివృద్ధి ధోరణి కనిపించడం లేదు. నరేంద్ర మోదీ ప్రభుత్వం పెట్టుబడులను ప్రోత్సహించడానికి అనేక ప్రయోగాలు చేసింది. దానితో పాటు కేంద్ర బడ్జెట్ పై నిర్హేతుకమైన ప్రతిబంధకాలు విధించింది. ఈ దశలో ప్రభుత్వానికి ఓ మార్గం ఉంది. ప్రభుత్వం రేటింగ్ ఏజెన్సీల మాట పక్కన పెట్టి మరింత ఖర్చు పెట్టి ఉపాధికల్పనకు ప్రయత్నించవచ్చు. జీవనోపాధికి తోడ్పడవచ్చు. కొనుగోలు శక్తి పెంచవచ్చు.

అయితే ప్రభుత్వం దేని మీద దృష్టి సారించాలి? ప్రభుత్వం భారీ రాజకీయ చర్యలు తీసుకోకూడదు. పెద్ద నోట్ల రద్దు, జి.ఎస్.టి. వల్ల ఆర్థిక వ్యవస్థకు మేలు కలగ లేదు. అందువల్ల గ్రామీణ మౌలిక సదుపాయాల కల్పన, వ్యవసాయ రంగంలో ప్రభుత్వ పెట్టుబడి, గ్రామీణ ప్రాంతాలలో వ్యవసాయేతర ఉపాధి కల్పన, ముఖ్యంగా వస్తూత్పత్తి రంగంలో ఉపాధి కల్పన, ఆరోగ్య, విద్యా రంగాలలో ఎక్కువ పెట్టుబడి అవసరం. వీటన్నింటివల్ల ఆదాయాలు పెరుగుతాయి. అప్పుడు గిరాకీ పెరిగి పెట్టుబడులు ఇనుమడిస్తాయి. 

Updated On : 6th Feb, 2018

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top