ISSN (Print) - 0012-9976 | ISSN (Online) - 2349-8846

సవాళ్ల నేపథ్యంలో సి.పి.ఎం. పంథా

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

హైదరాబాద్ లో ఏప్రిల్ 18 నుంచి 22 దాకా జరిగిన సి.పి.ఎం. 22వ జాతీయ మహాసభలో ఏదో కొత్త శక్తి, ఆత్మవిశ్వాసం కనిపించాయి. అంతకు ముందు 2012లో, 2015లో జరిగిన మహాసభల్లో ఇవేమీ లేవు. కార్ల్ మార్క్స్ పెట్టుబడి మొదటి సంపుటం వెలువడి 150 సంవత్సరాలు గత ఏడాది సెప్టెంబర్ పూర్తి కావడం, మే 5వ తేదీనాటికి మార్క్స్ ద్వి శతజయంతి జరగాల్సి ఉండడం ఈ నూతనోత్సాహానికి కారణం అయి ఉండవచ్చు. సి.పి.ఎం. మహాసభల వేదిక మీద కమ్యూనిస్టు ప్రణాళిక, పెట్టుబడి గ్రంథం ముఖచిత్రాలు స్పష్టంగా కనిపించాయి. ఆ పక్కనే మార్క్స్ చిత్రమూ ఉంది. ఇవన్నీ సి.పి.ఎం. మళ్లీ విప్లవాత్మక మార్గాన్ని అనుసరిస్తుందేమోనన్న ఆశ కలగజేస్తున్నాయి. తన ఆలోచనల్లో విప్లవ భావాలు కొరవడితే అవి నిలవవని బహుశః మార్క్స్ కామ్రేడ్లకు గుర్తు చేస్తున్నాడేమో! మరి ఆ పెద్దాయన కలిగించిన వివేకం సి.పి.ఎం. చెవికెక్కుతుందా?

2019 లో జరగనున్న ఎన్నికలలో బీజేపీ కనక మరో సారి అధికారంలోకి వస్తే అర్థ ఫాసిస్టు విధానాలు కొనసాగే ప్రమాదాన్ని గుర్తించినందువల్లే ఈ మహా సభల్లో సి.పి.ఎం. "సకల సెక్యులర్, ప్రజాస్వామ్య శక్తులను ఏకం చేసి బీజేపీని ఓడించవలసిన అవసరం ఉంది అని గ్రహించినట్టుంది. ఈ లక్ష్యాన్ని సాధించడానికి అవసరమైతే ఒక ఎత్తుగడగానైనా కాంగ్రెస్ తో సఖ్యత ఉండాలని మహాసభల్లో నిర్ణయించారు. మహాసభల్లో చర్చకోసం ప్రతిపాదించిన ముసాయిదా రాజకీయ తీర్మానంలో "సమైక్య కార్యాచరణ...సమైక్య పోరాటాలు...ఉమ్మడి ఉద్యమాలు...సెక్యులర్, ప్రజాస్వామ్య శక్తులను ఏకం చేయడం... అట్టడుగు స్థాయిలో మతతత్వ శక్తులకు వ్యతిరేకంగా పోరాడడం, ప్రజాస్వామ్య హక్కుల పరిరక్షణకు పాటు పడడం, బీజేపీ వ్యతిరేక ఓట్లను సమీకరించడానికి అనువైన ఎన్నికల ఎత్తుగడలను అనుసరించడం" లాంటి మాటలు పదే పదే వినిపించాయి.

మీడియా మాత్రం ఈ మహాసభలను సి.పి.ఎం.లో ప్రస్తుత ప్రధాన కార్యదర్శి సీతారాం ఏచూరి వర్గానికి, మాజీ ప్రధాన కార్యదర్శి ప్రకాశ్ కారత్ వర్గానికి మధ్య ఘర్షణగానే చిత్రీకరించింది. సీతారాం ఏచూరిని 2019 లోకసభ ఎన్నికలలో కాంగ్రెస్ తో స్పష్టమైన "అవగాహన" కుదుర్చుకోవాలని కోరుతున్న వ్యక్తిగానూ, ప్రకాశ్ కారత్ ను సమర్థించే వర్గం "కాంగ్రెస్ వ్యతిరేక" వైఖరి అనుసరిస్తున్నట్టు మీడియా చిత్రించింది. కాని వాస్తవం అది కాదు. కారత్ ఉద్దేశమల్లా కాంగ్రెస్ తో ఎన్నికలకు ముందు ఎలాంటి పొత్తు ఉండకూడదనే. 2004 లో లాగా ఎన్నికల తర్వాత కాంగ్రెస్ తో కలిసి పని చేయడానికి ఆయనకు అభ్యంతరం ఉన్నట్టు కనిపించదు. 2004 లో కాంగ్రెస్ నాయకత్వంలోని ప్రభుత్వాన్ని సి.పి.ఎం. సమర్థించినప్పుడు కారతే ప్రధాన కార్యదర్శిగా ఉన్నారు. ప్రతి నియోజకవర్గంలో బీజేపీని, దాని మిత్రపక్షాలను ఓడించడానికి ఏ ప్రతిపక్ష అభ్యర్థినైనా సమర్థించే వెసులుబాటు కారత్ వాదనలో ఉంది. మే 12వ తేదీన కర్నాటకలో జరగనున్న ఎన్నికలలో కూడా బీజేపీని, దాని మిత్రపక్షాల అభ్యర్థులను ఓడించగలిగే వారిని సమర్థించాలని సి.పి.ఎం. కేంద్ర కేమిటీ నిర్ణయించింది.

మోదీ ప్రభుత్వ హయాంలో "నయా ఉదారవాద పెట్టుబడిదార్ల దోపిడీ పెరిగిపోతోంది" అని సి.పి.ఎం. నిర్ధారించడం సరైందే. "రాజ్యాంగ చట్రంలోని సెక్యులర్, ప్రజాస్వామ్య తత్వాలకు విఘాతం కలుగుతోంది" అన్న సి.పి.ఎం. అంచనా కూడా సబబే. అంతే గాక మోదీ హయాంలో భారత్ అమెరికా సామ్రాజ్యవాదానికి లంకెగా తయారైంది. నిజానికి "నయా ఉదారవాద ఎజెండా"ను మొదట ప్రవేశ పెట్టింది కాంగ్రెసే. అమెరికాతో "వ్యూహాత్మక ఒప్పందం కుదుర్చుకున్నది" కూడా ఆ పార్టీనే. ఇప్పుడు ప్రధాన ప్రతిపక్ష పార్టీగా ఉన్న కాంగ్రెస్ ఇప్పటికీ "ఈ విధానాలనే కొనసాగిస్తోంది." అయితే బీజేపీని ఓడించడానికి పార్లమెంటులో సమర్థించడానికి సి.పి.ఎం. సిద్ధంగా ఉంది. అయితే కేరళలో యునైటెడ్ డెమోక్రాటిక్ అలయన్స్ కు నాయకత్వం వహిస్తున్న కాంగ్రెస్ సి.పి.ఎం. నాయకత్వంలోని వామపక్ష ఫ్రంట్ ను బీజేపీ వ్యతిరేకిస్తున్నంత తీవ్రంగానే వ్యతిరేకిస్తోంది. ప్రాంతీయ పార్టీలు మాత్రం కేంద్రంలో ఏ సంకీర్ణ ప్రభుత్వం వచ్చినా అందులో భాగస్వాములుగా ఉండడానికి అయితే కాంగ్రెస్ ను కాకపోతే బీజేపీని సమర్థించే "అవకాశవాద" వైఖరి అనుసరిస్తున్నాయి. అయినా సి.పి.ఎం. బీజేపీతో కత్తు కలపని ఈ ప్రాంతీయ పార్టీలను "సెక్యులర్ ప్రజాస్వామ్య శక్తులు"గానే భావిస్తోంది.

అయితే ఇలాంటి "సర్దుబాట్లు, కూటములు" కుదుర్చుకోవడం సి.పి.ఎం. కు కొత్త కాదు. బీజేపీని, దాని మాతృ సంస్థ లాంటి ఆర్.ఎస్.ఎస్. ను దూరంగా ఉంచడం కోసం 1991-2008 మధ్య సి.పి.ఎం. ఈ ప్రాంతీయ పార్టీలను సమర్థించింది. కానీ 2014 ఎన్నికలలో బీజేపీ స్వయంగా మెజారిటీ సాధించి కేంద్రంలో అధికారంలోకి వచ్చింది. మొత్తం 29 రాష్ట్రాలు ఉంటే 21 రాష్ట్రాలలో బి.జె.పి. స్వయంగా అధికారంలో ఉంది. లేదా సంకీర్ణ ప్రభుత్వాలు ఏర్పాటు చేసింది. లోక సభలో సి.పి.ఎం.కు తొమ్మిది మంది సభ్యులే ఉండగా, వామపక్ష ఫ్రంట్ లో భాగస్వామ్య పక్షమైన సి.పి.ఐ.కి ఒక్క సభుడే ఉన్నారు. ఒకప్పుడు సి.పి.ఎం.కు కంచుకోటలు అనుకున్న బెంగాల్, త్రిపుర రాష్ట్రాలలో భారీ అపజయాలను ఎదుర్కుంది. 2016 లో ఎన్నికలకు ముందు కాంగ్రెస్ తో పొత్తు కుదుర్చుకున్నా సి.పి.ఎం. పరాజయం పాలైంది. బడా వ్యాపారవేత్తలకు మార్గం సుగమం చేయడానికి సి.పి.ఎం. పోలీసుల, పార్టీ కాయకర్తల ద్వారా బలప్రయోగానికి దిగిందని బహుశః బెంగాల్ ప్రజలు మరిచి పోలేదేమో. ప్రస్తుతం కశ్మీర్ లో సాయుధ దళాల ప్రత్యేక అధికారాల చట్టాన్ని అమలు చేయకూడదంటున్న సి.పి.ఎం. త్రిపురలో అధికారంలో ఉన్నప్పుడు అదే చట్టాన్ని అమలు చేసింది.  సైన్యం అక్కడ విద్రోహ కార్యకలాపాలను అణచి వేసిన తర్వాత మాత్రమే 2015లో ఆ చట్టం అమలును నిలిపివేసింది.

బీజేపీ రూపంలో అర్థ ఫాసిస్టు ప్రమాదం మాట ఎలా ఉన్నా ఉత్సాహంగా కనిపిస్తున్న సి.పి.ఎం. మార్క్సిజం మూల తత్వమైన విప్లవ పంథా అనుసరిస్తుందో లేదో ఇప్పటికీ చెప్పలేం.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top