ISSN (Print) - 0012-9976 | ISSN (Online) - 2349-8846

ఏడేళ్లలో క్షయ వ్యాధి మాయం!?

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

వచ్చే ఏడేళ్ళలో ‘క్షయ లేని భారతం’ ఏర్పాటుకు కృషి చేయాలని ప్రధాని నరేంద్ర మోడీ గత నెల మొదట్లో పిలుపు ఇచ్చారు. అంటే 2025నాటికి దేశంలో ఒక్క క్షయ రోగి కూడా ఉండరాదని ఆయన అన్నారు.  అదే సమయంలో కేంద్ర ఆరోగ్య మంత్రిత్వ శాఖ విడుదల చేసిన ఒక సర్వే నివేదిక దేశంలో మారుమూల ప్రాంతాలలో కూడా జనాన్ని దుర్బలులను చేసే క్షయ వ్యాధి ఆనవాళ్ళు కనిపించాయని పేర్కొంది. ప్రపంచ ఆరోగ్య సంస్థ గణాంకాల ప్రకారం 2016 నాటికి నమోదైన ఒక కోటి క్షయ రోగులలో 28 లక్షల మంది భారత్ లోనే వున్నారు. వారిలో 1,40,000మందికి బహుళ ఔషద చికిత్శ కూడా పని చేయడం లేదు. అదే సంవత్సరం క్షయ వ్యాధి బారిన పడి 4,23,000 మంది మరణించారు. బహుళ ఔషధ చికిత్స, విస్తృత ఔషధ చికిత్సలకు స్పందించని, అసలు మందులు పని చేయని రోగులు ఇండియాలో చాలా మంది వున్నారు. దేశవ్యాప్తంగా క్షయ వ్యాధి ఎంతగా వ్యాప్తి చెందిందో దీనివల్ల స్పష్టమవుతోంది. ప్రభుత్వం ఇటివల విడుదల చేసిన గణాంకాల ప్రకారం రోగుల్లో నాల్గవ వంతు మందికి అసలు మందులే పని చేయడం లేదు. క్షయ వ్యాధి ప్రధానంగా పేదవారిని కబలిస్తోంది  పట్టణ మధ్య తరగతి వారిలో కూడా భిన్న రూపాలలో క్షయ వ్యాధి జాడలు కనిపిస్తున్నాయి. దీనికి ప్రధానంగా మధుమేహం  పెరగడం , రోగ నిరోధక శక్తిని తగ్గించే  ఇతర వ్యాధుల వ్యాప్తి కూడా క్షయ రోగుల పెరుగుదలకు దోహదం చేస్తోంది.  కొందరిలో క్షయ , ఎయిడ్స్ కలసి వస్తున్నాయి. ప్రభుత్వం వెలువరించిన నివేదికలో ప్రైవేటు రంగంలో చికిత్స పొందుతున్న  వారి గురించి, ఇంకా రోగ నిర్ధారణ కాని వారి గురించి ప్రస్తావన లేదు. ఇలాంటి పరిస్థితిలో వచ్చే ఏడేళ్ళలో ఏదైనా మహాద్భుతము జరిగినా కూడా ‘క్షయ ముక్త భారత్’ ను సృష్టించలేదు.  

క్షయ కారణంగా రోగులు సామాజికంగా- ఆర్దికంగా  చితికి పోతారు.  ప్రధానంగా పేదలను ఇది ఎక్కువగా దెబ్బతీస్తుంది.  ఇప్పటికీ దేశంలో క్షయ వ్యాధి సోకిందంటే  సామాజికంగా మచ్చ పడుతుంది. జాతీయ క్షయ నియంత్రణ కార్యక్రమం ఏర్పాటు వల్ల క్షయను గురించి, చికిత్స గురించి ప్రజలకు బాగా తెలిసింది. తరువాత  ఈ కార్యక్రమం అమలులో లోపాలను సవరించారు.  రోగులను ప్రత్యక్షంగా పరిశీలన జరుపుతూ ఆరు నెలల పాటు మందులు ఇచ్చే ‘డాట్స్’ కార్యక్రమం ప్రవేశపెట్టారు.   క్షయ రోగుల చికిత్సలో ఇది ఓ మైలు రాయి.  కానీ దీని అమలుకు సిబ్బంది , మందుల కొరత అవరోధంగా వున్నాయి.  అంతేకాక ప్రజారోగ్య వ్యవస్థతో దీనిని అనుసంధానం చేయలేదు.  ఫలితంగా ప్రభుత్వం ఉచితంగా క్షయ వ్యాధి నిర్ధారణ పరీక్షలు జరిపి, చికిత్స అందిస్తోందనే సంగతి తెలియని చాలామంది ప్రైవేటు ఆసుపత్రులకు వెళ్తున్నారు. నిజానికి 60% క్షయ చికిత్స ప్రైవేటు ఆసుపత్రులలో జరుగుతోంది.  వారికి సరైన శిక్షణ గాని, చికిత్సను అందించేందుకు తగిన సమాచారం గాని వారికి లేదు.   అయితే క్షయ వ్యాధికి మంచి  చికిత్సను అందించే ప్రైవేటు వైద్యులు కూడా లేకపోలేదు.  రోగ నిర్ధారణలో లోపాలు, ఇష్టం వచ్చినట్లు మందులు వాడటం, ఆపకుండా చికిత్స పొందక పోవడం  వంటి కారణాల వల్ల రోగం ముదిరి ఎలాంటి చికిత్సకు లొంగకుండా తయారవుతోంది.

ఇది ప్రజారోగ్య ఎమర్జెన్సీ గా మారే ప్రమాదముంది. ఆ ముప్పును తప్పించడానికి  ఎన్నో సూచనలు వచ్చాయి. వాటిలో దేశవ్యాప్తంగా ఒకే విధమైన విధానం కాకుండా మౌలిక, సామాజిక-ఆర్ధిక అంశాలను పరిగణన లోకి తీసుకొని ప్రాంతాలవారీ విధానాన్ని అమలు చేయాలని, కఫం పరీక్ష ద్వారా  వ్యాధి నిర్ధారణ జరిపే పురాతన పద్దతిపై ఎక్కువ ఆధారపడకుండా దానిపై  పునః సమీక్ష జరపాల్సిన అవసరం వుందని సూచనలు వచ్చాయి. అంతే కాక అణువుసంబంధిత పరీక్షలు జరపడం ద్వారా ప్రాణాంతక బాక్టీరియాను కనుగొనవచ్చుననే సూచన కూడా వచ్చింది.

వ్యాధిని గురించి జనంలో జాగృతి కలిగించేందుకు, సత్వరం కనుగొనేందుకు సామాజిక ఆరోగ్య కార్యకర్తలను  ఈ కార్యక్రమంలో చురుకుగా వినియోగించుకోవాలనే సూచనకు ప్రభుత్వం చెవివోగ్గాలి.  క్షయ అంటువ్యాది. దీనిని దృష్టిలో వుంచుకొని క్షయ రోగులున్న ఇంటిలోని పిల్లలను పరీక్షించి చికిత్స చేయాల్సిన అవసరం ఉంది. అంతేకాక మధుమేహం, ఎయిడ్స్ రోగులకు క్షయ తొందరగా సోకే అవకాశం ఉంది. అడ్డు ఆపు లేని పట్టణీకరణ వల్ల జనసాంద్రత పెరిగిపోయి మురికివాడలు, పారిశుద్ద్యం వంటి సమస్యలు పెరిగాయి. వాటిని  పరిష్కరించడంతో పాటు , ప్రైవేటు ఆరోగ్య సేవలు అందించే వారి దోపిడీని నియంత్రించాలి.  క్షయ వ్యాధి సోకడం వల్ల వచ్చే సామాజిక కళంకం వంటి వాటికి సమాధానం చెప్పాలి. క్షయ వ్యాది వ్యాప్తికి  గల ప్రాథమిక , తీవ్రమైన కారణాలలో  పోషకాహార లోపం, పేదరికం ప్రధానమైనవి.  ఆరు నెలల  ‘డాట్స్’ చికిత్స పొందే రోగులకు మందులతో పాటు మంచి పోషకాహారం ఇచ్చినప్పుడే చికిత్స బాగా పనిచేస్తుంది. రాష్ట్ర ప్రభుత్వాలు  ‘డాట్స్’ కార్యక్రమం కింద పోషకాహారం అందించాలి.

క్షయ వ్యాధి పై పోరాటం చేసేందుకు నాణ్యమైన రోగ నిర్ధారణ పద్దతులతో పాటు సరైన పోషకాహారం, పారిశుధ్య  వసతులు కల్పించాలి. చెప్పడానికి ఇది సులభంగా కనిపిస్తున్నప్పటికీ వాస్తవంలో చూస్తె చాలా మంది రోగులకు అవి అందుబాటులో లేవు.  ప్రజారోగ్య రంగానికి నిధులు సమకూర్చడం కీలకమైన సమస్య. 

2025 నాటికి క్షయ వ్యాధిని నిర్మూలించాలని ప్రభుత్వం జాతీయ వ్యూహాత్మక ప్రణాళిక విడుదల చేసింది.  కాని ఇందు కోసం చేసే ఖర్చు స్థూల దేశీయ ఉత్పత్తిలో 1.4% మాత్రమె.  దేశంలో అధిక సంఖ్యలో ఉన్న క్షయ రోగులకు చికిత్స అందించడంతో పాటు వ్యాధి వ్యాప్తి నిరోధక చర్యలు అవసరం. ఇందుకు పెద్ద మొత్తంలో నిధులు కావాలి. దానికోసం ప్రభుత్వం రెండు అంశాలలో రాజకీయ చిత్త్తశుద్ది చూపాలి.  మొదటిది మొత్తంమీద  ఆరోగ్య సేవలకు,  క్షయవ్యాధిపై పోరాటానికి ప్రత్యేకంగా వనరుల కేటాయింపును పెంచాలి.  రెండవది బహుళ ఔషద చికిత్శ పొందే క్షయ  రోగులు ఎక్కువగా వాడే రెండు అత్యవసర ఔషధాలను చౌకగా తయారు చేసేందుకు భారతీయ జనరిక్ మందుల ఉత్పత్తిదారులకు అనుమతి ఇవ్వడం ద్వారా ఆ మందులకు పేదలకు అందుబాటులోకి తేవాలి.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top