ISSN (Print) - 0012-9976 | ISSN (Online) - 2349-8846

వాణిజ్య పోరుకు తెర తీస్తున్న ట్రంప్

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

మార్చి ఒకటిన అమెరికా అధ్యక్షుడు డొనాల్డ్‌ ట్రంప్, ‘జాతీయ భద్రత’ పేరుతో ఉక్కు మీద 25 శాతం, అల్యూమినియం మీద 10 శాతం దిగుమతి సుంకాన్ని విధిస్తూ చేసిన ప్రకటన ఓ వాణిజ్య పోరుకి దారితీస్తుందనే అభిప్రాయం సర్వత్రా నెలకొని ఉంది. ఈ పోరు మొదలయ్యేందుకు ఇంకా సమయం ఉంది. కానీ, ప్రపంచంలోని అతిపెద్ద ఆర్థిక వ్యవస్థల మధ్య నెలకొనే ఇలాంటి సమరం ప్రపంచ వ్యాపార రంగం కుంచించుకుపోయేలా చేస్తుందని చెప్పేందుకు నైపుణ్యం అవసరం లేదు. ఇప్పటికే భౌగోళిక రాజకీయ విభేదాలతో సతమతం అవుతున్న ప్రపంచ ఆర్థిక రంగం, తిరోగమనంలోకి కూరుకుపోయేందుకు ఇది దారితీయవచ్చు. ‘అమెరికానే ముందు’ అనే జాతీయవాద భావంలో మునిగితేలుతున్న ట్రంప్‌ ఇలాంటి విపత్తుకి దారితీస్తాడని తెలుస్తూనే ఉంది. నేరుగా పేర్లు ఎత్తకుండానే, అజ్ఞాత దేశాల మీద రంకెలు వేస్తూ... అవి అమెరికాలోని అల్యూమినియం, స్టీల్‌ పరిశ్రమలను నాశనం చేశాయని ఆరోపించారు ట్రంప్‌. దిగుమతి సుంకాన్ని పెంచుతూ తీసుకున్న తన నిర్ణయాన్ని బలపరుస్తూ: ‘‘మీ దేశం ఇకపై అల్యూమినియం, ఉక్కుఉత్పత్తి చేయలేని పరిస్థితికి చేరుకున్నప్పుడు, దేశం అని చెప్పుకొనేందుకు అక్కడ పెద్దగా ఏమీ మిగలదు,’’ అని ప్రకటించారు.

అమెరికాలోని అల్యూమినియం, ఉక్కు పరిశ్రమలకు చెందిన కార్యనిర్వాహక సభ్యులతో జరిగిన సమావేశం తర్వాత ఈ ప్రకటన వెలువడటం విశేషం. దీంతో స్థానిక ఉక్కు, అల్యూమినియం ఉత్పత్తుల ధరలు, లాభాలే ఈ నిర్ణయం తీసుకునేందుకు దోహదపడ్డాయని అర్థమవుతోంది. ఈ పెంపు వల్ల వాహనాల తయారీ, విమానాల తయారీ, నిర్మాణ రంగం, యంత్రాలు వంటి ఉక్కు, అల్యూమినియం ఆధారిత పరిశ్రమల మీదా... తత్ఫలితంగా అంతర్జాతీయ స్థాయిలో తమ పోటీదారుల మీదా ఎలాంటి ప్రభావం పడుతుందో ట్రంప్ పెద్దగా పరిగణనలోకి తీసుకున్నట్లు లేదు. మార్చి 6న ట్రంప్‌కు ముఖ్య ఆర్థిక సలహాదారుగాను, జాతీయ ఆర్థిక సంఘానికి అధ్యక్షునిగాను ఉండి... వాణిజ్య లాభాల మీదా, వ్యక్తిగత ఆదాయాల మీదా పన్ను మినహాయింపు చర్యలకు కారణమైన గెరీ కోహెన్‌ రాజినామా చేశారు. ఇదివరకు గోల్డ్‌మెన్ శాక్స్ ఉన్నతాధికారిగా పనిచేసిన కోహెన్‌, ట్రంప్ ‘జాతీయ భద్రతా’ జట్టులో భాగంగా ఉన్న హెచ్‌ఆర్‌ మెక్‌మాస్టర్‌ (అమెరికా జాతీయ భద్రతా సలహాదారు), రెక్స్‌ టిల్లర్‌సన్ (విదేశాంగ మంత్రి), జిమ్‌ మేటిస్ (రక్షణశాఖ సలహాదారు)తో పాటు దిగుమతి సుంకం పెంపుదల మీద తన వ్యతిరేకతను వ్యక్తం చేశారు. వాషింగ్టన్‌కు రక్షణగా నిలిచే జర్మనీ, ఫ్రాన్స్‌, జపాన్‌, కెనడా, దక్షిణ కొరియా వంటి దేశాలతో ఉన్న సంబంధాల మీద ఈ సుంకం ప్రతికూల ప్రభావం చూపుతుందన్నది వీరి వాదన.

దిగుమతి సుంకం మీద మొట్టమొదటి స్పందన ఐరోపా సమాఖ్య నుంచి; అమెరికా ఫ్రీ ట్రేడ్‌ అగ్రీమెంట్‌ (నాఫ్తా)లోని వ్యాపార భాగస్వాముల నుంచి; కెనడా, మెక్సికోల నుంచి వెలువడింది. ఈ సుంకాన్ని ప్రపంచ వాణిజ్య సంస్థ (డబ్ల్యూటీఓ)లో ‘వివాద పరిష్కార విభాగం’ ఎదుట చట్టపరంగా సవాలు చేస్తామంటూ, ఐరోపా సమాజం కమీషనర్‌ సిసిలియా మాల్‌స్ట్రోం పేర్కొన్నారు. దీనికి ప్రతిచర్యగా కొన్ని అమెరికన్‌ ఉత్పత్తుల మీద సుంకాలను పెంచుతామని హెచ్చరించారు. దీన్ని ఒక వ్యాపార పోరుగా పేర్కొనేందుకు ఆవిడ సుముఖంగా లేనప్పటికీ, ట్రంప్‌ మాత్రం ఇందుకు బదులుగా ఐరోపా కార్ల మీద సుంకాన్ని పెంచే అవకాశం ఉన్నట్టు సూచించారు. ఐరోపో సమాజం తన ప్రతిచర్యలలో భాగంగా అమెరికా ఉత్పత్తి చేసే హార్లే డేవిడ్‌సన్ వాహనాల మీద సుంకాన్ని విధించే అవకాశం ఉండటంతో... ట్రంప్‌ ఐరోపాలో ఉత్పత్తయ్యే కార్ల మీద సుంకాన్ని పెంచే అవకాశాన్ని ప్రకటించారు. శ్వేతసౌధంలో ‘‘అమెరికానే ముందు’’ భావజాలంతో ఉన్న ఆర్థిక జాతీయవాదులు పీటర్‌ నవార్రో (శ్వేతసౌధ జాతీయ వాణిజ్య సమాఖ్య నిర్దేశకుడు), విల్‌బర్‌ రాస్‌ (వాణిజ్య మంత్రి)... కోహెన్‌ మీద పైచేయి సాధించారు. అయితే రిపబ్లికన్లు, ముఖ్యంగా సభ స్పీకర్‌ పాల్ డి రియాన్... ఈ నిర్ణయాన్ని తీవ్రంగా వ్యతిరేకించారు.

దిగుమతి సుంకం మీద అమెరికా తీసుకున్న నిర్ణయిం నుంచి తమకు మినహాయింపు ఇవ్వమంటూ కెనడా, మెక్సికో దేశాలు అడిగినప్పుడు... నాఫ్తా పునర్యవస్థీకరణలో భాగంగా తమ ఆంక్షలను ఒప్పుకుంటేనే, వారికి మినహాయింపు దక్కే అవకాశం ఉందంటూ అమెరికా సదరు దేశాల ప్రతినిధులకు స్పష్టం చేసినట్లు తెలిసింది. నాఫ్తా మీద జరుగుతున్న సంప్రదింపులలో భాగంగా, తమ తలల మీద తుపాకీని గురిపెట్టి అమెరికా తనకి కావల్సిన పని జరిపించుకుంటోందంటూ ఆ ప్రతినిధులలో ఒకరు వాపోయారు. వాణిజ్య, ఉత్పత్తి ప్రణాళిక శాఖకు అధ్యక్షునిగా కూడా ఉన్న నవర్రో- ఏవో కొన్ని దేశాలకు మినహాయింపు ఇవ్వడం సాధ్యం కాదనీ చెబుతూనే, ఉత్పాదక సంస్థలు వ్యక్తిగతంగా ఈ మినహాయింపు కోరవచ్చని ఓ ఆసక్తికరమైన వ్యాఖ్య చేశారు. ఇలాంటి చర్యలు సహజంగానే లాబీయింగ్‌కు దారితీసే ప్రమాదం ఉంది.

ఇన్ని విభేదాల మధ్య కూడా, దూకుడైన వాణిజ్యతత్వాన్ని ప్రదర్శించే చైనా మీద ట్రంప్‌ తన వాణిజ్య పోరుని గురిపెట్టాలంటూ ఓ అభిప్రాయం బలంగా వినిపిస్తోంది. ఇలాంటి పోరులో తనతో భాగస్వాములుగా ఉండేందుకు సిద్ధపడే దేశాల మీద ట్రంప్‌ ఎందుకు దాడి చేస్తున్నారన్నది ఓ పెద్ద ప్రశ్న. ఇంతకంటే చైనా ‘‘నకిలీ సాఫ్టవేర్‌’’, ‘‘వ్యాపార రహస్యాల చోరీ’’, ‘‘నకిలీ వస్తువుల’’ను లక్ష్యంగా చేసుకుని ఉండాల్సింది. ఇలాంటి సందర్భాలలో చైనా ‘‘ముఖ్య దోషి’’ కాబట్టి 1988 నాటి ఆమ్నిబస్‌ ట్రేడ్ అండ్ కాంపిటిటివ్‌నెస్‌ చట్టం ప్రకారం... మేధోపరమైన హక్కులను ‘‘దొంగిలిస్తున్నందుకు’’, అమెరికా వాణిజ్య లక్ష్యాలకు ‘‘విఘాతం’’ కలిగిస్తున్నందుకు చైనా ‘‘చేతిని మెలిపెట్టాల్సి’’ ఉంది. చైనా నుంచి దిగుమత అయ్యే పాదరక్షలు, వస్త్రాలు, దుస్తులు, ఎలక్ట్రానిక్‌ ఉత్పత్తుల మీద కూడా నిషేద సుంకాలు విధించాలనే పిలుపులు వినవస్తున్నాయి.

చైనా మాత్రం జరుగుతున్న పరిణామాల మీద స్పందించేందుకు విముఖంగా ఉంది. ఇప్పటివరకూ డబ్ల్యూటీఓ నిబంధనల ఆధారంగా జరుగుతున్న బహుముఖ వాణిజ్య వ్యవస్థని అతిక్రమించడంలో భాగంగానే, ట్రంప్ ఈ ‘‘రక్షణాత్మక’’ చర్యలకు పాల్పడినట్లు చెబుతున్నారు. 1930 జూన్‌లో 20,000 వస్తువుల మీద దిగుమతి సుంకాన్ని పెంచుతూ అమెరికా తీసుకువచ్చిన స్మూట్‌- హాలే చట్టం తరహా వాతావరణాన్ని మరోసారి ప్రపంచం చూడనుంది. స్మూట్‌- హాలే చట్టం తీవ్రమైన వాణిజ్య పోరుని, ప్రపంచం వాణిజ్యంలో కుంగుబాటునీ, తీవ్ర ఆర్థిక మాంద్యాన్ని ప్రోత్సహించే పరిస్థితులనీ కల్పించింది.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top