ISSN (Print) - 0012-9976 | ISSN (Online) - 2349-8846

మానవతను కాపాడాల్సిన తరుణం

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

తీవ్రవాదానికి ఇస్లాం నెలవు అన్న నింద మోపడం ప్రస్తుతం ప్రపంచంలో రివాజు అయిపోయింది. ముస్లింలను తీవ్రవాదులుగా ముద్ర వేయడం పడికట్టు పదంలా మారిపోయింది. మరో వేపున బౌద్ధ మతం శాంతియుతమైందని, హేతుబద్ధమైదని, ఆధునిక జీవన సరళికి తగినదని అంటున్నారు. మైన్మార్ లో అల్పసంఖ్యాక ముస్లిం వర్గమైన రోహింగ్యాలను బౌద్ధ తీవ్రవాదులు పీడించడం, దానికి సైనిక ప్రభుత్వం అండదండలు అందించడం చూస్తే దక్షిణాసియాలోనూ, ఆగ్నేయాసియాలోనూ బౌద్ధంపై ఉన్న సానుకూల అభిప్రాయానికి విఘాతం కలుగుతోంది. అయినప్పటికీ భారత్ తో సహా అనేక దేశాలు ఈ సంక్షోభాన్ని తమకు ఏమీ పట్టనట్టుగానే కాకుండా ఇస్లాం వ్యతిరేక దృష్టితోనే చూడడం అలవాటై పోయింది.

2017 ఆగస్టు 25న అరకాన్ రొహింగ్యా విముక్తి సేనకు అనుబంధంగా ఉన్న మిలిటెంట్లు పోలీసు శిబిరాలపైన, ఒక సైనిక స్థావరంపైన దాడి చేసిన తర్వాత తాజా హింసా కాండ ప్రజ్వలించింది. దీనితో సైన్యం విరుచుకుపడడంతో జాతిపరమైన హింసా కాండ చెలరేగింది. ఇందులో చాలామంది రొహింగ్యాలు మరణించారు. వేలాది మంది నిర్వాసితులయ్యారు. 90,000 కన్నా ఎక్కువ మంది రొహింగ్యాలు ఆగస్టు నుంచి బంగ్లాదేశ్ కు శరణార్థులుగా వచ్చారు. మరో 20,000 మంది మైన్మార్, బంగ్లాదేశ్ సరిహద్దు దాటడానికి అవకాశం కోసం చూస్తున్నారు. తమ దేశ సరిహద్దు లోపల రొహింగ్యాలకు సహాయం చేయడానికి ఐక్య రాజ్య సమితి అనుబంధ సంస్థలను మైన్మార్ అనుమతించడం లేదు. మీడియా మీద ఆంక్షలు విధించారు. అంటే రాజ్య వ్యవస్థ మారణకాండకు పూనుకుంటుందనడానికి ఇది సూచన. పరిస్థితి ఇలా ఉన్నప్పటికీ మైన్మార్ పొరుగు దేశాలు రొహింగ్యా శరణార్థులకు ఆశ్రయం ఇవ్వడానికి అంగీకరించడం లేదు. భారత ప్రభుత్వం అయితే ఏకంగా ఈ శరణార్థులు దేశ ఆంతరంగిక భద్రతకు ముప్పు అనేదాకా వెళ్లింది.

1962లో సైనిక కుట్ర జరిగినప్పటి నుంచి మైన్మార్ లో రొహింగ్యాలు పీడనకు గురి అవుతూనే ఉన్నారు. వారికి పౌరసత్వం ఇవ్వడం లేదు. ఆరోగ్య, విద్యా, ఉపాధి సదుపాయాలు అందుబాటులో లేకుండా చేశారు. 2011లో మైన్మార్ ప్రజాస్వామ్య వ్యవస్థ వేపు పరిణామం చెందుతోందని చెప్పినప్పటి నుంచి రొహింగ్యాల మీద హింసా కాండ మరింత పెచ్చరిల్లింది. జనం మద్దతు నిలబెట్టుకోవడానికి సైన్యం తాము బౌద్ధమత పరిరక్షకులం అని చెప్పుకుంటోంది. బౌద్ధ తీవ్రవాదులు రెచ్చిపోవడాన్ని ప్రోత్సహిస్తోంది.

ప్రస్తుతం జరుగుతున్న హింసా కాండ నిజానికి 2016 అక్టోబర్ లో ప్రారంభమైన దౌర్జన్య కాండకు కొనసాగింపు మాత్రమే. గత సంవత్సరం రొహింగ్యాల మీద కొనసాగిన హింసా కాండ "మానవత మీద నేరానికి పాల్పడడమే" నని ఐక్య రాజ్య సమితి నిజ నిర్ధారణ కమిటీ 2017 నాటి నివేదికలో తెలియజేసింది. ఇది బహుశా "ఒక జాతిని మట్టుపెట్టడమే" అని తేల్చింది. మైన్మార్ ప్రభుత్వం ఈ నివేదికను తిరస్కరించింది. 2017 మేలో ఐక్య రాజ్య సమితి మరో నిజ నిర్ధారణ సంఘాన్ని పంపించాలనుకున్నప్పుడు ఆ బృందంలో ఒక్కరికి కూడా వీసా ఇవ్వబోమని ప్రకటించి దుస్సాహసానికి పాల్పడింది. ప్రజాస్వామ్య పద్ధతిలో ఎన్నికైన నాయకురాలు, నోబెల్ బహుమతి గ్రహీత అంగ్ సాన్ సూచీ ఐక్య రాజ్య సమితి నిజ నిర్ధారణ సంఘం పర్యటన వల్ల రెండు వర్గాల మధ్య వైషమ్యాలు మరింత పెరుగుతాయని ప్రకటించారు. ఆగస్టులో జరిగిన హింసా కాండ తర్వాత చాలా కాలంపాటు ఈ దుర్భర పరిస్థితిపై మౌనం వహించిన సూచీ ఇప్పుడు జాతి నిర్మూలన కార్యక్రమం జరుగుతోందన్నది కేవలం అసత్య ప్రచారం మాత్రమేనని, ఇది "తీవ్రవాదుల ప్రయోజనాలను ప్రోత్సహిస్తుంది" అని అంటున్నారు. దీని వల్ల రెండు వర్గాల మధ్య వైషమ్యాలు మరింత పెరుగుతాయని చెప్తున్నారు.

ఈ సంక్షోభంపై భారత ప్రభుత్వం తీరు మరింత సిగ్గు చేటుగా ఉంది. దాదాపు 40,000 మంది రొహింగ్యాలు దేశంలోని వివిధ ప్రాంతాలలో అక్రమంగా నివసిస్తున్నారని, వీరిని వెనక్కు పంపిస్తామని ప్రకటించింది. భారత్ ఐక్య రాజ్య సమితి శరణార్థుల ఒప్పందంపై సంతకం చేయలేదు కనక భారత ప్రభుత్వం అనుసరిస్తున్న వైఖరి సమంజసమైందేనని కేంద్ర హోం శాఖ సహాయ మంత్రి కిరణ్ రిజుజు అంటున్నారు. అందువల్ల రొహింగ్యాల విషయంలో ఐక్య రాజ్య సమితి అభిప్రాయాలతో భారత్ కు సంబంధం లేదని కూడా ఆయన తెగేసి చెప్పారు. కాని అనేక సందర్భాలలో సుప్రీం కోర్టు, హైకోర్టులు కుడా శరణార్థులను తిప్పి పంపకూడదన్న సూత్రాన్ని సమర్థించాయి. ఒక దేశంలోని వారు అక్కడ పీడన కారణంగా శరణార్థులుగా వస్తే వారిని నిరాకరించకూడదన్నది అంతర్జాతీయ ప్రమాణం. ఇది ప్రస్తుతం అంతర్జాతీయ న్యాయ సూత్రంగా చెలామణి అవుతోంది. దీన్ని ప్రస్తుత భారత ప్రభుత్వం నిరాకరించడానికి వీలు లేదు. రొహింగ్యా శరణార్థులను తిప్పి పంపడాన్ని సవాలు చేస్తూ దాఖలైన పిటిషన్ ప్రస్తుతం సుప్రీం కోర్టు పరిశీలనలో ఉంది.

మరింత భయంకరమైన అంశం ఏమిటంటే ప్రస్తుత ప్రభుత్వం 1955 నాటి పౌరసత్వ చట్టాన్ని సవరించాలనుకుంటోంది. దీనివల్ల ఇస్లాం వ్యతిరేకతను వ్యవస్థీకరించడానికి వీలవుతుంది. శరణు కోరే ముస్లింలను నిరాకరించడం సులువు అవుతుంది. ఇది రాజ్యాంగం పూచీ పడుతున్న సమనత్వా సూత్రానికి విరుద్ధమైంది. నైతికంగా సమర్థించడానికి వీలు లేనిది.

నిధుల లేమి, నిరాధారమైన ఊహల ఆధారంగా శరణార్థుల రూపంలో తీవ్రవాదులు దేశంలోకి చొరబడతారన్న వాదనలకు వ్యతిరేకంగా నిరసనలను బలోపేతం చేయవలసిన అగత్యం ఉంది. జరుగుతున్న మారణకాండను చూస్తూ కూర్చూకోవడానికి ఈ వాదనలను అంగీకరించడానికి వీలు లేదు. ప్రాణభయంతో, పీడన తట్టుకోలేక శరణుజొచ్చే వారికి ఆశ్రయం కల్పించడానికి అత్యంత ప్రాధాన్యం ఇవ్వవలసిన అవసరం ఉంది. మతం, జాతిని బట్టి శరణు ఇవ్వడమో ఇవ్వకుండా ఉండడమో సాధ్యం కాకూడదు. కొంప గూడు వదులుకుని ప్రాణభయంతో శరణుజొచ్చే వారికి పునరావాసం కల్పించడానికి అవసరమైన నిధులను అంతర్జాతీయ స్థాయిలో సమకూర్చుకోవాలి. శరణార్థులకు సహాయం నిరాకరించి వారిని మృత్యు కుహరంలోకి నెట్టి వేయడం ఏ మాత్రం ఆమోదించగలిగే అంశం కాదు. 

Updated On : 13th Nov, 2017

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top