ISSN (Print) - 0012-9976 | ISSN (Online) - 2349-8846

வெற்றிகரமான வர்த்தகம் அல்ல

ஜெட் ஏர்வேஸ் நெருக்கடி பயணிகள் விமான சேவையில் உள்ள பிரச்னைகளை அம்பலப்படுத்தியிருக்கிறது, அமைப்புரீதியான ஆபத்துகளையும் வெளிப்படுத்தியிருக்கிறது.

 

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

உள்நாட்டு விமான சேவை துறை பெரும் நெருக்கடியில் சிக்கியிருக்கிறது. ஜெட் ஏர்வேஸால் தனது முக்கியமான சேவைகளுக்காக கடனளிப்பவர்களிடமிருந்து அவசர நிதி பெற முடியவில்லை. சந்தை மதிப்பின்படி ஒரு காலத்தில் இந்தியாவின் மிகப் பெரும் தனியார் விமான நிறுவனமாக இருந்த ஜெட் ஏர்வேஸ் இப்போது தனது விமான சேவையை தற்காலிகமாக நிறுத்திக்கொள்ளும் நிலைக்கு தள்ளப்பட்டிருக்கிறது. கடனளித்தவர்களுக்கு திருப்பித்தர முடியாத நிலையிலும், ஊழியர்களுக்கு சம்பளம் தர முடியாத நிலையிலும் இந்த நிறுவனம் தத்தளித்துக் கொண்டிருக்கிறது. இந் நிறுவனத்திற்கு இடத்தை வாடகை விட்டிருந்தவர்கள் அதன் விமானங்களையும், விமான நிலையத்தில் அதற்கு ஒதுக்கப்பட்டிருந்த இடங்களையும் எடுத்துக்கொண்ட நிலையில் இந் நிறுவனத்தின் விமான சேவை உரிமைகள் பிற நிறுவனங்களுக்கு தரப்பட்டுவிட்டன. ஸ்டேட் பாங்க் ஆஃப் இந்தியாவின் தலைமையில், கடனளிப்பவர்கள் புதிய முதலீட்டாளர்களுக்கான ஏல நடவடிக்கையை தொடங்கியிருந்தாலும் முற்றுகையிடப்பட்ட நிலையிலிருக்கும் இந் நிறுவனத்தின் நிலை நம்பிக்கையளிப்பதாக இல்லை.

இந்தச் சூழ்நிலை எச்சரிக்கை மணியை ஒலித்திருக்கிறது: இந்தியாவில் வர்த்தக விமான சேவை நடத்தப்படும் விதத்தில் அடிப்படையான தவறு ஏதாவது இருக்கிறதா? விமான சேவை குறைந்த லாபம் தரக்கூடிய வர்த்தகம் என்று சொல்லப்பட்டாலும் புறக் காரணிகளான ரூபாய்க்கும் டாலருக்கும் இடையிலான பரிவர்த்தனை மதிப்பில் நிலவும் நிலையற்றதன்மை, விமானத்திற்கான பெட்ரோல் மீது விதிக்கப்படும் அதிக வரி ஆகியவையும் வர்த்தக விமான சேவையை நெருக்கடிக்கு உள்ளாக்குகின்றன. ஆனால், விமான சேவையில் நிலவும் விலைப் போட்டியின் இயல்பு மற்றும் பயணிகளுக்கான எல்லா வசதிகளுடன் இயங்கும் ஜெட் ஏர்வேஸ் போன்ற நிறுவனங்கள் தங்களது எல்லையை விஸ்தரிப்பது அவற்றை நெருக்கடியில் சிக்கவைத்துவிடுகின்றன. விமானங்களின் எண்ணிக்கையை பெருமளவில் அதிகரித்து, விலையையும் குறைத்தது என்பது பெரும் இழப்பை ஏற்படுத்திவிட்டது. இந்த நிலையிலும் திறனுடன் நடத்தப்பட்ட குறைந்த விலையிலான விமான சேவை நிறுவனங்கள் வெற்றிகரமாக தாக்குபிடித்துள்ளன. இன்று இந்தியாவில் ஆகப் பெரும் விமான சேவை நிறுவனமாக இருக்கு இண்டிகோ 2018 மார்ச் 31ல் முடியும் நிதி ஆண்டிற்கான நிகர லாபமாக 2,242.37 கோடி காட்டியிருக்கிறது.

  விமான போக்குவரத்து பொது இயக்குனரகம் வெளியிட்டுள்ள பயணிகள் விமான புள்ளிவிவரங்கள் நெருடலான உண்மைகளை தெரிவிக்கின்றன. ஒன்று, 2007-08 முதல் 2017-18 வரையிலான காலகட்டத்தில் பயணிகள் விமான போக்குவரத்து ஆண்டுக்கு 10.87% வளர்ந்திருந்தபோதிலும் 2017-18ஆம் ஆண்டில் அது 18.65% மற்றும் 2016-17ல் 21.82% என்ற அளவில் சரிவைக் கண்டிருக்கிறது. இரண்டு, பெரும்பாலான நிறுவனங்களுக்கு அதிக எண்ணிக்கையிலான பயணிகள் (பேஸஞ்சர் லோட் ஃபேக்டர், பி.எல்.எஃப்) கிடைக்கப்பெற்றனர். இவற்றில் ஐந்தில் இரண்டு பங்கின் பி.எல்.எஃப். லாபமோ, இழப்போ இல்லாத நிலையையே அடைய முடிந்தது என்பது அதிக எண்ணிக்கையிலான பயணிகள் என்பது லாபத்தை நிச்சயம் அதிகரிக்கும் என்பதற்கு உத்தரவாதமில்லை என்பதையே காட்டுகிறது. மேலும் மூன்றில் ஒரு பங்கு நிறுவனங்கள் மட்டுமே லாபகரமாக இயங்குகின்றன.

     இந்த தொழிற்துறை பெரும்பாலும் செலவினத்தை எந்த அளவிற்கு குறைக்க முடியுமோ அந்த அளவிற்கு குறைத்து செயல்படுவதாகும். சந்தையிலுள்ள சுமார் 70% நிறுவனங்கள் தங்கள் செலவை குறைக்கப் போராடுகின்றன. தொழிலில் தாக்குபிடிக்கவும், “குறைந்த-செலவு” மாதிரிகளை தொடர்ந்து நீடிக்கவும் பயணிகளுக்காக போட்டியிடுவது என்ற உத்தியை பின்பற்றுவது ஆபத்தானதாகும். விமானப் பயணத்தின் விலையை அதிகரிக்கச் செய்ய கட்டமைப்புரீதியான மாற்றங்களைக் கொண்டுவரவேண்டியுள்ளது. அதிலும் குறிப்பாக அரசின் கொள்கைகள் நிச்சயமற்றதன்மையை கட்டுப்படுத்தத் தவறும் நிலையில் இது அவசியம்.

ஆனால், இத் துறையை பாதித்துள்ள கட்டமைப்பு மற்றும் கொள்கை தொடர்பான அம்சங்களைத் தவிர்த்து ஜெட் ஏர்வேஸின் இன்றைய நெருக்கடி அதுவாக உருவாக்கிக்கொண்டதுமாகும். 2007ல் அது ஏர் சஹாராவை வாங்கியதிலிருந்து அதன் நிதிப் பிரச்னைகள் தொடங்கின. கடந்த நான்கு காலாண்டுகளாக அது தொடர்ந்து இழப்புகளை காட்டிவருவதுடன் கடந்த 11 நிதியாண்டுகளில் ஒன்பதில் நட்டத்தையே காட்டிவருகிறது. மேலும் அதன் பங்கு சந்தையில் பாதியாகக் குறைந்துவிட்டது. அதனிடம் வெற்றிகரமான வர்த்தகத்திற்கான மாதிரி ஏதுமில்லை, செலவை ஈடுகட்டுமளவிற்கு வருமானம் இல்லாததால் தொடர்ந்து கடன்கள் கூடிக்கொண்டே வந்தன.

 நிதி மேலாண்மை தவறாக இருந்ததுடன் தனது நிறுவனத்தில் பிற முதலீட்டாளர்களை முதலீடு செய்யவைக்க முடியாதுபோனதும் பிரச்னைகளை அதிகமாக்கியது. 2013ல் எத்தியாட் ஏர்வேஸ் 24% பங்குகளை வாங்கியபோதிலும் கடன் பெற அடமானம் வைத்த சொத்தின் மதிப்பு கடன் மதிப்பிற்கும் கீழாக இறங்கிவிட்டது. 2018 மார்ச் 31ல் 634.45 கோடியை இழப்பாக காட்டிய ஜெட் ஏர்வேஸின் மொத்தக் கடன் 8,425 கோடியாக உயர்ந்தது. இந் நிலையிலும்கூட கூட முதலீடு கொண்டுவருவதில் தோல்வி ஏற்பட்டதுடன் நிறுவனத்தின் கட்டுப்பாட்டை விட்டுக்கொடுக்காதிருப்பதில் அதன் நிறுவனர் நரேஷ் கோயல் காட்டிய பிடிவாதம் அல்லது நிறுவனத்தை வாங்குவதில் ஆர்வம்கொண்டவர்களின் நிபந்தனைகளை ஒப்புக்கொள்ள மறுத்தது, புதிய முதலீடுகள் வருவதை தடுத்தது ஆகியவை இன்றைய இக்கட்டான நிலையை உருவாக்கியிருக்கின்றன.

ஆனால் முக்கியமான கேள்வி என்னவெனில், 2018லேயே நிதிப் பிரச்னைகள் கடுமையாக இருந்தது நன்கு தெளிவாகத் தெரிந்த நிலையில் நிதி நிறுவனங்கள் ஏன் உரிய நேரத்தில் தலையிட்டு நிறுவனத்தை காப்பாற்ற முயலவில்லை என்பதுதான். ஜெட் ஏர்வேஸின் மொத்தக் கடன்களில் 27% ஸ்டேட் பாங்க் ஆஃப் இந்தியாவிற்குத் தரவேண்டியதாகும். கடன் பிரச்னை முன்னமே தீர்க்கப்பட்டிருந்தால் ஏர்வேஸின் சொத்துக்களின் மதிப்பு வீழ்ச்சியடைவது தடுக்கப்பட்டிருக்கும். மொத்தக் கடன் 7,251 கோடியாக உள்ள நிலையில் புதிய உரிமையாளர் ஜெட் ஏர்வேஸுக்கு புத்துயிரூட்டுவார் என்றால் கடனில் பெரும் பகுதியைத் தந்திருக்கும் பொதுத் துறை வங்கிகள் தாங்கள் தந்த கடனின் மதிப்பை குறைத்துக்கொள்ள வேண்டியிருக்கும்.

இது நடக்கவேண்டுமெனில், தங்களுக்கு பாதகமாக இருந்தாலும் ஜெட் ஏர்வேஸின் கடன்களை பொதுத் துறை வங்கிகள் கணிசமாக தள்ளுபடி செய்யவேண்டும். ஆக, இறுதியில் என்ன நடந்தபோதிலும், ஏற்கனவே 23,000 பணியாளர்கள் வேலை இழந்திருப்பதுடன் கடன் கொடுத்தவர்களும் இழக்க வேண்டியிருக்கும்.    

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top