ISSN (Print) - 0012-9976 | ISSN (Online) - 2349-8846

ஆயுஷ்மான் பாரத் – தனியார் மருத்துவம் நீடூழி வாழ்க

ஆயுஷ்மான் பாரத் - தேசிய சுகாதார பாதுகாப்புத் திட்டம் தொடர்ந்து நீடிக்குமா என்பது கேள்விக்குரியதே.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

மனிதன் என்னும் மூலதனம் வளர்வதற்கான மிக முக்கியமான ஓர் அம்சம்தான் ஆரோக்கியமான மக்கள். இது பொருளாதார வளர்ச்சிக்குத் தேவையான முதன்மையான அம்சம். உலக வங்கி கூறுவதன்படி, 2015ல் இந்தியாவின் மொத்த உள்நாட்டு உற்பத்தியில் (ஜிடிபி) மருத்துவ செலவினம் 3.8%. இதுவே அமெரிக்காவில் 16.8%, உலக அளவில் 9.9%. இந்தியாவின் மொத்த மக்கள்தொகையில் பதினைந்து சதவீதம் பேர் காப்பீடு செய்துள்ளனர், இந்தியாவின் மொத்த மருத்துவ செலவினத்தில் 94% தனிநபர்கள் தங்களது சொந்தப் பணத்தை செலவு செய்கிறார்கள். இதனால் எதிர்பாரா மருத்துவ செலவுகள் தனிநபர்களையும், குடும்பங்களையும் கடன் வலையில் சிக்கவைத்துவிடுகின்றன. ஏழைகளுக்கு மருத்துவ காப்பீடு வழங்குவது தனிநபர்களின் ஆரோக்கியத்தை மேம்படுத்துவதுடன் பல பெரிய நன்மைகளையும் தன்னகத்தே கொண்டுள்ளது. இது குடும்பங்களை கடன் என்னும் விஷ வலையிலிருந்து வெளியில் கொண்டுவரும்.

இந்தப் பின்னணியில், ஆயுஷ்மான் பாரத் – தேசிய சுகாதார பாதுகாப்புத் திட்டம், இத் திட்டம் மோடிகேர் என்றும் அழைப்படுகிறது, பெரும் ஆவலை தூண்டிவிட்டிருக்கிறது. ஆயுஷ்மான் பாரத் திட்டமானது குடும்பம் ஒன்றிற்கு 5 லட்சம் என 10 கோடி ஏழைக் குடும்பங்களுக்கு மருத்துவ காப்பீடு வழங்குகிறது. சமூக-பொருளாதார சாதி கணக்கெடுப்பு தரவுதளத்திலிருந்து இத் திட்டத்திற்கு தகுதி பெற்ற குடும்பங்கள் தெரிவு செய்யப்படும். அரசாங்க சுகாதார மையங்களை மேம்படுத்தி அடிப்படை மருத்துவ வசதிகளை அளிப்பது என்ற வகையில் ஆயுஷ்மான் பாரத் இதற்கு முன்னர் இருந்த ராஷ்டீரிய ஸ்வஸ்த்ய பிமா யோஜனா போன்ற திட்டங்களிலிருந்து முக்கியமாக வேறுபடுகிறது. காப்பீட்டுத் தொகையும் வெறும்  30,000லிருந்து 5 லட்சமாக உயர்த்தப்பட்டுள்ளது. மேலும், மொத்த நடவடிக்கையையும் கணிணிமயமாக்கவும் திட்டமிருக்கிறது. இது ஆந்திர பிரதேசத்தின் மருத்துவ காப்பீட்டுத் திட்டமான ராஜீவ் ஆரோக்யஸ்ரீயிலிருந்து கடனாகப் பெறப்படும். மொத்த மக்கள்தொகையில் 40% பேரை அரசாங்கம் இலக்கு வைத்திருக்கிறது.

இந்த திட்டத்தை எப்படி தொடர்ந்து நடத்துவது என்பது இதிலுள்ள முக்கியமான பிரச்னைகளுள் ஒன்று. இது அரசின் நிதிச் சுமையை மேலும் அதிகமாக்கும். நேரடிப் பணப்பலன் பரிமாற்றத்திலிருந்து சேமிக்கப்பட்ட 90,000 கோடிகள் இருப்பதாகவும் அதிலிருந்து இதற்கான நிதியை தர முடியுமெனவும் அரசாங்கம் கூறுகிறது. ஆனால் இந்தப் பணம் ஏற்கனவே நிதிக் கணக்கீடுகளில் கணக்கில் எடுத்துக்கொள்ளப்பட்டுவிட்டது. மேலும், இதில் 40% நிதிச் சுமையை மாநில அரசாங்கங்கள் ஏற்க வேண்டுமென்பதால் அவை மத்திய அரசாங்கத்திடமிருந்து அதிக மூலாதாரங்களை கேட்கும். இது வறுமைக் கோட்டிற்கு கீழே உள்ளவர்களைக் அதிகமாகக் கொண்ட ஏழை மாநிலங்களுக்கு பெரும் பிரச்னையாக இருக்கும். ஆகவே, இந்தக் கொள்கை ஏழை மாநிலங்களுக்கு மிகக் கடினமான சுமையாக இருக்கும்.

மருத்துவ உள்கட்டமைப்பு வசதிகள் இருக்கும் நிலை பெரும் பிரச்னையாக இருக்கும். குறிப்பாக மையத்திலிருந்து மிகவும் விலகியிருக்கும் பகுதிகளில் இந்தப் பிரச்னை முக்கியமானது. நாட்டின் மொத்த மக்கள்தொகையில் 28% பேர் வாழும் நகர்ப்புறத்தில் சுமார் 80% மருத்துவர்களும், 75% மருத்துவமனைகளும் உள்ளன. மீதமுள்ள பகுதிகளுக்கு அடிப்படை மருத்துவ வசதிகளே பெரும் பற்றாக்குறையாக இருக்கும் நிலை. 1000 பேருக்கு 0.9 படுக்கைகள் என்ற நிலைதான் இந்தியாவில், இதுவே வளர்ந்த நாடுகளில் 6.5 ஆக இருக்கிறது. இந்தியாவில் 1000 பேருக்கு 0.6 மருத்துவர்களும், வளர்ந்த நாடுகளில் இது 3 ஆகவும் இருக்கிறது. வெறும் 37% மக்களுக்குத்தான் 5 கிமீ தூரத்திற்குள் உள்நோயாளிகளுக்கான சிகிச்சை வசதி கொண்ட மருத்துமனைகள் உள்ளன, 68% மக்களுக்குதான் 5 கிமீ தூரத்திற்குள் வெளிநோயாளிகள் சிகிச்சை பெறுவதற்கான மருத்துவமனைகள் உள்ளன. உலக வங்கி கூறுவதன்படி, இந்தியாவில் 2015ல் கூட 15% குழந்தைகளுக்கு அடிப்படை தடுப்பூசி மருந்துகள் கிடைப்பதில்லை.

அரசாங்க மருத்துவ சேவைகள் இல்லாததன் காரணமாக தனியார் துறையை சார்ந்திருக்க வேண்டியுள்ளது. அரசாங்க மருத்துவத் துறை நன்கு வளர்ந்துள்ள பகுதிகளில் தனியார் மருத்துவ சிகிச்சைக்காக செய்யப்படும் செலவுகள் குறைவு என்பது நன்கு தெரிந்த விஷயம். உதாரணமாக, தமிழ்நாட்டில் தனியார் மருத்துவ சேவையானது அரசாங்க மருத்துவ சேவையுடன் போட்டியிட வேண்டியுள்ளது என்பதால் தரப்படும் சேவைகளின் தரத்துடன் ஒப்பிடுகையில் தனியார் மருத்துவச் செலவு குறைவு. இதற்கு மாறாக வட மாநிலங்களில் தனியார் மருத்துவமனைகளில் ஆகும் செலவுகள் விண்ணைத் தொடுகின்றன. இத்தகைய மருத்துவமனைகளில் நடக்கும் முறைகேடுகளை கண்காணிக்க நம்பகத்தகுந்த அமைப்புகள் ஏதுமில்லை. முறைகேடுகள் தீவிரமாக கண்காணிக்கப்படாவிட்டால் காப்பீடு பணம் முழுவதையும் ஒரே தடவையில் காலி செய்துவிடுவார்கள். உதாரணமாக, தீராத நோயால் பாதிக்கப்பட்டிருக்கும் ஒருவருக்கு பல முறை அறுவை சிகிச்சை செய்யப்படலாம். அந்த நோயாளி அநேகமாக இறக்கக்கூடும். ஆனாலும் காப்பீடு இல்லாத நிலையில், அதிக பணம் பிடிக்கும் அதி நவீன மருத்துவமனையில் சிகிச்சை எடுக்க வேண்டியிருப்பதால், அந்தக் குடும்பமே பெரும் கடன் வலையில் தள்ளப்படும்.

அதே நேரத்தில், அரசாங்க மருத்துவமனைகளின் மருத்துவர்களையும் கண்காணிக்க வேண்டும். நிறைய பணம் கிடைக்கிறது என்பதற்காக அரசாங்க மருத்துவர்கள் தனியாக தொழில் செய்கிறார்கள் என்பது அனைவரும் அறிந்த விஷயம். மருத்துவ காப்பீடுகள் தனியார் மருத்துவ சிகிச்சைகளுக்கும் பொருந்தும் என்பதால் அரசாங்க மருத்துவர்கள் தனியாக மருத்துவம் பார்க்கிறார்கள் அல்லது மருத்துவமனை நடத்துகிறார்கள்.

காப்பீடு நிறுவனம்தானே பணம் தரப்போகிறது என்ற எண்ணத்தால் பின்விளைவுகளைப் பற்றி கவலைப்படாத போக்கு பயனாளர்களையும் பாதிக்கும். பணம் அதிகம் பிடிக்கும் தனியார் மருத்துவமனைக்கும் நாம் போக முடியும் என்பதால் சிறு பிரச்னைகளுக்குக் கூட இவர்கள் அங்கே போவார்கள். மேலும் சேமிக்கும் ஆர்வம் குறைந்து சிகரெட், புகையிலை போன்ற ஆபத்தான விஷயங்களில் செலவிடுவார்கள். இத்தகைய அம்சங்களை கண்காணிப்பதற்கான அமைப்புகள், முகமைகள் நமக்குத் தேவை. இத்தகைய பிரச்னைகளின் சாத்தியங்கள் பற்றி அமலாக்கத்துறை முகமைகள் யோசித்திருக்கின்றனவா, இவற்றைக் களைய நடவடிக்கை ஏதும் எடுத்திருக்கின்றனவா என்பது தெரியவில்லை.

ஆகவே, ஆயுஷ்மான் பாரத் சிறந்த திட்டம்தான் ஆனால் எச்சரிக்கையுடன் அமல்படுத்தாவிடில் அது சமாளிக்க முடியாத, கொடுமையான அனுபவமாக முடிந்துவிடும். கொள்கை வகுப்பாளர்கள் இந்தப் பிரச்னைகளை மனதில்கொள்ள வேண்டும். இந்த பல்வேறு அம்சங்களை பகுப்பாய்வு செய்ய நமக்கு மேலும் சிறந்த தரவுகளும் தேவை.

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top