ISSN (Print) - 0012-9976 | ISSN (Online) - 2349-8846

நுகர்வோர் விலைகளால் கட்டுப்படுத்தப்படுதல்

சிபிஐ பணவீக்கத்தை கட்டுப்படுத்துதலே இலக்கு என்ற நிலைக்கு ரிசர்வ் வங்கியின் பண மேலாண்மையானது தாழ்த்தப்படுவது அதிகரித்துவருகிறது.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

தானே பரப்பிய பணவீக்க எதிர்பார்ப்புகளுக்கு பாவ்லோவியன் எதிர்வினையை மீண்டும் ஒரு முறை ஆற்றியிருக்கிறது இந்திய ரிசர்வ் வங்கி. வர்த்தக வங்கிகளுக்கு தான் அளிக்கும் கடன்களுக்கான வட்டியை (ரெப்போ ரேட்) தொடர்ந்து இரண்டாவது முறையாக அதிகரித்திருக்கிறது ரிசர்வ் வங்கி. முதலில் 6%லிருந்து 6.25%ஆகவும், பின்னர் அதை 6.50%ஆகவும் உயர்த்தியிருக்கிறது. இதே போன்று ரிவர்ஸ் ரெப்போ ரேட், மார்ஜினல் ஸ்டேண்டிங் ஃபெஸிலிட்டி ரேட், வங்கி வட்டி ஆகியவற்றையும் உயர்த்தியிருக்கிறது. இந்த வங்கிகளுக்கு ரிசர்வ் வங்கி தரும் லிகுவிட் ஃபண்டின் விலையை உயர்த்துவதும் இதன் மூலம் வங்கிகளில் கடன் வாங்குபவர்களின் வட்டி வீதத்தை அதிகரிப்பதும் இதன் நோக்கமாகும். இது ஒரு குறிப்பிட்ட எல்லை வரை சில்லறை விற்பனையில் ஏற்படும் பணவீக்கத்தை கட்டுப்படுத்துவதற்கானதாகும்.

நாட்டின் பொருளாதாரத்தை மேலாண்மை செய்வதில் இரண்டு சக்தி வாய்ந்த கொள்கைகளான நிதி மற்றும் பணக் கொள்கைகள் (பிஸ்கல் மற்றும் மானிட்டரி)  தாராளவாத பொருளாதார சட்டகத்திற்குள் அடைக்கப்பட்டுவிட்ட து உண்மையிலேயே வேதனையை அளிக்கிறது. பொருளாதர உயர் வளர்ச்சி, அதிக வேலைவாய்ப்புகள், சமூக ஏற்றத்தாழ்வை குறைத்தல் போன்றவற்றை சாதிப்பதற்காக அந்தக் கொள்கைகள் பயன்படுவது தடுக்கப்பட்டுவிட்டது. நிதி தொகுக்கப்படுவதன் வழிமுறை இந்தியாவில் சமூகத் துறைகளுக்கான நிதி ஒதுக்கீட்டை குறைத்துவிட்டது. சமூக வளர்ச்சிக் குறியீடுகளில் தன்னைப் போன்ற நாடுகளுடன் ஒப்பிடுகிறபோது இந்தியா மிகவும் பின்தங்கியுள்ளது. இத்தகைய நிலை அமைப்பின் சமத்துவமின்மையை மேலும் அதிகரித்துவிட்டது.

பணக் கொள்கை (மானிட்டரி பாலிஸி) விஷயத்தில் ரிசர்வ் வங்கியின் பொறுப்பானது குறுக்கப்பட்டுவிட்டது. இவ்வாறு பணக் கொள்கை குறுக்கப்படுவதை இதற்கு முன்னர் இருந்த ஏறக்குறைய அனைத்து ரிசர்வ் வங்கி ஆளுனர்களும் ஆட்சேபித்துள்ளனர். பணவீக்கத்தின் மீது மட்டுமே கவனத்தை குவிப்பது என்பது வளர்ச்சி விஷயங்களில் ரிசர்வ் வங்கியின் கவனத்தை இல்லாததாக்கிவிடும் என்பதாலேயே அவர்கள் ஆட்சேபித்தனர். இந்தியாவில் ஏற்படும் பணவீக்கமானது பெரும்பாலும் விநியோகம் சார்ந்த பிரச்னைகளால் ஏற்படுவது. இதன் மீது ரிசர்வ் வங்கிக்கு எந்தக் கட்டுப்பாடும் கிடையாது. ஆக, பணக் கொள்கை எவ்வாறு பொருளாதார சூழலை பாதிக்கிறது என்பது ஒரு பலவீனமான கண்ணியாகவே இருக்கிறது. நுகர்வோர் விலை குறியீட்டெண்ணின் (சிபிஐ) பணவீக்க விகிதத்தில் ஏற்படும் இயக்கங்கள் தனது ரெப்போ ரேட் மாற்றங்களால் விளைந்தவை என்ற ரிசர்வ் வங்கியின் கூற்றை பல தனிப்பட்ட ஆய்வுகள் கேள்விக்குட்படுத்தியுள்ளன.

மேலும், பணவீக்கம் பல முறைகளால் அளவிடப்படுகிறது: நுகர்வோர் விலை குறியீட்டெண் (சிபிஐ), மொத்த விலைக் குறியீட்டெண் மற்றும் மொத்த உள்நாட்டு உற்பத்தி (ஜிடிபி) குறைப்பான்கள் (deflators). இவை ஒவ்வொன்றும் வெவ்வேறு ஆட்களுக்கு, அதாவது நுகர்வோர் மற்றும் உற்பத்தியாளர்களுக்கு, வெவ்வேறு விதமாக பொருந்தக் கூடியவை. குஜராத்தில் நடந்த பால் பண்ணை இயக்கம் ஒரு சரியான உதாரணம். ஒரு நாட்டின் வளரும் பொருளாதாரத்தில் விலை உயர்வு என்பது உற்பத்தியாளர்களுக்கு உற்பத்தியை அதிகரிப்பதற்கான ஊக்கத்தொகையாக இருக்கிறது என்பதை பால் பண்ணை இயக்கம் காட்டுகிறது. பல்வேறு பண்டங்களின் மற்றும் சேவைகளின் சார்பு விலை நடத்தையை கருத்தில் கொள்கிறபோது 4% சிபிஐ இலக்கானது மிகவும் குறைவு. பணவீக்கத்திலேயே உட்பிரிவுகள் இருக்கின்றன. தலைப்புவரி (ஹெட்லைன்) மற்றும் சாராம்ச (கோர்) பணவீக்கம். கடைசியாக தான் கலந்துகொண்ட ஊடகவியலாளர்கள் கூட்டத்தில் பேசிய ரிசர்வ் வங்கி ஆளுனர் ‘’சிபிஐ தலைப்புவரிதான் (ஹெட்லைன்) இலக்கு. அதை 4%த்தில் வைப்பதே நமது கொள்கையின் நோக்கம்’’ என்றார்.

பணவீக்க விகிதத்தை நிர்ணயிப்பது அல்லது வளர்ச்சி மேலாண்மை குறித்த முழுமையான அணுகுமுறை என இரண்டில் எந்தவொன்றை தெரிவு செய்வது என்பதை ரிசர்வ் வங்கியும் அரசாங்கமும் முடிவு செய்தாக வேண்டிய நேரமிது. பொருளாதாரத்தில் நிதி சேமிப்பு என்கிற மிக அவசியமான தேவையை ஊக்குவிப்பதை தனது இலக்காக ரிசர்வ் வங்கி கொள்ள வேண்டும். வங்கியில் வைப்புத்தொகை வைத்திருப்பவர்களுக்கு கிடைக்கும் வட்டி வீதம் அவர்களை ஊக்குவிப்பதாக இருக்க வேண்டும். ஏனெனில் இதன் மூலமே ஏராளமானவர்களை சேமிக்க வைக்க முடியும். சிறுசேமிப்பாளர்களுக்கு ஏற்ற வகையில் நிதி ஊக்கத்த்தொகைகள் உருவாக்கப்பட வேண்டும். சேமிப்பவர்களில் பெரும்பான்மையானவர்கள் இவர்களே என்றாலும் பணக் கொள்கை விஷயத்தில் இவர்கள் கண்டுகொள்ளப்படுவதில்லை. இதற்கு முன்பிருந்த கடுமையான வட்டி விகித கட்டுப்பாட்டு முறைக்கு திரும்பிப்போவது நோக்கமல்ல என்றாலும் குறைந்தது ஓராண்டிற்கு வங்கியில் போடப்படும் வைப்புத்தொகைக்கு கடந்த ஆண்டின் சிபிஐ பணவீக்க விகிதத்திற்கு ஏற்றவாறு குறைந்தது +2% தரப்பட வேண்டும். மற்ற சேமிப்பிற்கான வட்டி விகிதங்கள், வைப்புத்தொகை சேமிப்பு உட்பட, காலப்போக்கில் சரிசெய்யப்படும். வங்கிகள் பின்பற்ற வேண்டும் என்று சொல்லப்பட்டுள்ள மார்ஜினல் காஸ்ட் ஆஃப் ஃபண்ட்ஸ் அடிப்படையிலான வட்டி விகிதத்தின் அடிப்படையில் வங்கிகள் மீது சுமத்தப்படும் கூடுதல் நிதி செலவுகள் சரி செய்யப்படும்.

வளர்ச்சி நடவடிக்கைகளுக்காக வங்கிக் கடன் தருவது தொடர்பான விஷயங்களில், வாராக் கடன்களின் காரணமாக கார்ப்போரேட்டுகள் மற்றும் வங்கிகளின் இரட்டை இருப்புநிலை குறிப்பு பிரச்னைகளில் ஆட்சியாளர்கள் முழுக் கவனத்தை செலுத்துவதாகத் தோன்றுகிறது. மறுபுறத்தில், இந்தியப் பொருளாதாரக் கட்டமைப்பில் பெரும் ஆதிக்கம் செலுத்தும் அமைப்பு சார துறைகள் வங்கி அமைப்பால் உதாசீனப்படுத்தப்படுகிறது. பொருளாதாரத்தின் பல்வேறு துறைகளில் இயங்கிக் கொண்டிருக்கும் கோடிக்கணக்கான அமைப்பு சாரா நிறுவனங்களை இந்திய வங்கி அமைப்பு பயன்படுத்திக் கொள்ளவில்லையாதலால் இந்தியாவின் தனியார் வங்கிகள் அளிக்கும் கடன் ஜிடிபி விகிதத்தில் 52% மட்டுமே. ஆனால் இந்தியாவின் பொருளாதாரத்துடன் ஒப்பிடத்தகுந்த பிற நாடுகளில் இது 110% அல்லது அதற்கும் அதிகம். பயன்படுத்தப்படாமல் இருக்கும் இந்த ஆற்றல்களை பயன்படுத்துவதற்கான வழிகள் குறித்து தீவிரமாக ஆராயப்பட வேண்டும். பெரிய வளர்ச்சி நிதி நிறுவனங்கள் மூடப்பட்டுவிட்டதன் காரணமாக தொழில்மயமாக்கம் பெரும் பின்னடைவை சந்தித்துள்ளது. ஒன்றரை ஆண்டுகளுக்கு முன்னர் ரிசர்வ் வங்கி இது தொடர்பாக அறிவித்த புதிய திட்டமும் நடைமுறைக்கு வரவில்லை. அது ஏன் என்பதும் தெரியவில்லை. இந்தத் திட்டத்தின் சித்தாந்த பலவீனம் என்னவெனில் இது வங்கியல்லாத தனியார் துறை நிதி நிறுவனங்களுக்கு மட்டுமே முக்கியத்துவம் தருகிறது. ஆனால், பொதுத் துறையின் ஆதரவு இல்லாமல் தொழிற்துறைக்கு தேவையான நீண்ட கால நிதியாதாரங்களை தனியார் நிதி நிறுவனங்களால் ஒருபோதும் திரட்ட முடியாது.

வளர்ச்சி தொடர்பான ஏராளமான பிரச்னைகள் ரிசர்வ் வங்கி மற்றும் அரசாங்கத்தின் கவனத்திற்காக காத்திருக்கும் இன்றைய வளர்ச்சி நிலையில் இதிலுள்ள பிரச்னைகளை விரிவாக ஆராயவும், பொருத்தமான பரிந்துரைகளை அளிக்கவும் வல்ல உயர்நிலைக் குழு ஒன்று அமைக்க வேண்டியதற்கான காலம் வேகமாக கடந்துகொண்டிருக்கிறது. 

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top