ISSN (Print) - 0012-9976 | ISSN (Online) - 2349-8846

ಸಂಪಾದಕರ ಮೇಜಿನಿಂದ

..

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

(ಎಕಾನಾಮಿಕ್ ಅಂಡ್ ಪೊಲಿಟಿಕಲ್ ವೀಕ್ಲಿ (ಇಪಿಡಬ್ಲ್ಯೂ) ಹೊಸ ಸಂಪಾದಕರಾದ ಪ್ರೊ. ಗೋಪಾಲ್ ಗುರು ಬರೆಯುತ್ತಾರೆ..)

ಎಕಾನಾಮಿಕ್ ಅಂಡ್ ಪೊಲಿಟಿಕಲ್ ವೀಕ್ಲಿ (ಇಪಿಡಬ್ಲ್ಯೂ)ನ ಸಂಪಾದಕನಾಗಿ ಈ ಪತ್ರಿಕೆಯ ಜೊತೆಗೆ ನನಗೆ ಸಂಬಂಧ ಏರ್ಪಡುತ್ತಿರುವುದು ನನಗೆ ಸಂದ ದೊಡ್ಡ ಗೌರವ ಎಂದು ನಾನು ಭಾವಿಸುತ್ತೇನೆ. ಇಪಿಡಬ್ಲ್ಯೂ ಪತ್ರಿಕೆಯು ಒಂದು ಘನಗಂಭೀರವಾದ  ವಿದ್ವತ್ ಪತ್ರಿಕೆಯೆಂಬ ಪ್ರತಿಷ್ಟೆ ಧೃಡವಾಗಿ ರುಜುವಾತಾಗಿರುವ ಸಂದರ್ಭದಲ್ಲಿ ಅದರ ಸಂಪಾದಕನಾಗುವುದು ಒಂದು ದೊಡ್ಡ ಹೆಮ್ಮೆಯೇ ಸರಿ. ಇದು ಸಾಧ್ಯವಾಗಿರುವುದು ಇಪಿಡಬ್ಲ್ಯೂ ಪತ್ರಿಕೆಯ ತಂಡವು ವಿಶ್ರಾಂತರಹಿತವಾಗಿ ಹಾಕುತ್ತಿರುವ ಶ್ರಮ, ಬದ್ಧತೆ ಮತ್ತು ಕಾಳಜಿಗಳಿಂದ. ಅಷ್ಟೇ ಮಟ್ಟಿಗೆ ಹೊರಗಿರುವ ವಿಶಾಲವಾದ ಇಪಿಡಬ್ಲ್ಯೂ ಸಮುದಾಯವು ತೋರುತ್ತಿರುವ ಆಸ್ಥೆಯೂ ಸಹ ಈ ಪತ್ರಿಕೆ ಇಂದು ಕಾಪಾಡಿಕೊಂಡು ಬಂದಿರುವ ಅದರ ಅದ್ವಿತೀಯ ಸ್ಥಾನಕ್ಕೆ ಕಾರಣವಾಗಿದೆ. ಹೀಗಾಗಿ ಇಪಿಡಬ್ಲ್ಯೂ ಸಂಪಾದಕನಾಗಿ ಔಪಚಾರಿಕವಾಗಿ ಅದರ ಜವಾಬ್ದಾರಿ ಹೊರುವುದೆಂದರೆ ಸಂಸ್ಥೆಯ ಒಳಗಿನ ಅಭಿಪ್ರಾಯಗಳಿಗೆ ಮಾತ್ರವಲ್ಲದೆ ಅದಕ್ಕಿಂತ ಭಿನ್ನವಾದ ಮತ್ತು ವೈವಿಧ್ಯಮಯವಾದ ಅಭಿಮತಗಳಿಗೆ ಅವಕಾಶ ಒದಗಿಸುವ ವಿಶಿಷ್ಟ ಜವಬ್ದಾರಿಯನ್ನು ಹೊರಬೇಕು ಎಂದರ್ಥ; ವಿವಿಧ ರಾಜಕೀಯ ಅಭಿವ್ಯಕ್ತಿಗಳು ಮತ್ತು ಆರ್ಥಿಕ ಬದಲಾವಣೆಗಳ ನಡುವಿನ ಸಂಕೀರ್ಣ ಸಂಬಂಧಗಳ ಹಿಂದಿನ ಸ್ಥಳೀಯ  ಮತ್ತು ಜಾಗತಿಕ ಸಂದರ್ಭಗಳೆರಡನ್ನು ಅರ್ಥಮಾಡಿಕೊಳ್ಳಲು ಬೇಕಾದ ಕೀಲಕಪ್ರಾಯ ಚಿಂತನೆಗಳಿಗೆ ವೇದಿಕೆಯಾಗುವುದು ಎಂದರ್ಥ. ವಿವಿಧ ಚಿಂತನಾ ಧಾರೆಗಳ ಮತ್ತು ಜನತೆಯ ಕ್ರಾಂತಿಕಾರಿ ಆಚರಣೆಗಳ ನೆಲೆಗಳಿಂದ ಹುಟ್ಟಿಕೊಳ್ಳುವ ಚಿಂತನೆಗಳನ್ನು ಬರಮಾಡಿಕೊಂಡು, ಸೋಸಿ ಜನರಿಗೆ ಒದಗಿಸುವುದು ಈ ಪತ್ರಿಕೆಯ ಅನನ್ಯವಾದ ಸಂಪ್ರದಾಯವಾಗಿದೆ.

ಹೀಗಾಗಿ ಈ ಪತ್ರಿಕೆಯು ಒಂದು ಮುಕ್ತ ವಿಶ್ವವಿದ್ಯಾಲಯವೆಂದು ಬಣ್ಣಿಸಿದರೆ ಅದು ಸಮಂಜಸವಾದ ಉತ್ಪ್ರೇಕ್ಷೆಯೇ ಆಗಿರುತ್ತದೆ. ಈ ಪತ್ರಿಕೆ ಯಾವುದೇ ನಿರ್ದಿಷ್ಟ ಬಗೆಯ ಚಿಂತನೆಯನ್ನು ತನ್ನ ಓದುಗರ ಮೇಲೆ ಹೇರುವುದಿಲ್ಲ. ಬದಲಿಗೆ ಪ್ರತಿಯೊಂದು ಜೀವಿಗೂ ಸಮಾನ ಮಾನವೀಯ ಮೌಲ್ಯಗಳನ್ನು ದೊರಕಿಸುವ ಅಗತ್ಯದ ಬಗ್ಗೆ ಏಕೀಭವಿಸುವ ವಿವಿಧ ದೃಷ್ಟಿಕೋನಗಳನ್ನು ಸಮಾನ ಗೌರವದಿಂದ ಕಾಣುತ್ತದೆ. ಹೀಗಾಗಿ ಇಪಿಡಬ್ಲ್ಯೂ ಪತ್ರಿಕೆಯ ಪುಟಗಳಲ್ಲಿ ಕಂಡುಬರುವ ಲೇಖನಗಳು ಸಾರದಲ್ಲಿ ವಾಗ್ವಾದದ ರೂಪದಲ್ಲೂ ಮತ್ತು ಅಭಿವ್ಯಕ್ತಿಯಲ್ಲಿ ವಿಮರ್ಶಾತ್ಮಕವಾಗಿಯೂ ಇರುತ್ತವೆ. ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಹತ್ವವುಳ್ಳ ವಿಷಯಗಳ ಬಗೆಗಿನ ಚರ್ಚೆಗಳಿಗೆ ಈ ಪತ್ರಿಕೆ ವೇದಿಕೆ ಕಲ್ಪಿಸುತ್ತದೆ.

ಆರ್ಥಿಕತೆ ಮತ್ತು ರಾಜಕೀಯಗಳೆರಡರ ಸ್ವರೂಪಗಳು ಬದಲಾಗುತ್ತಿರುವ ಇಂದಿನ ಸಂಕ್ರಮಣ ಸಂದರ್ಭದಲ್ಲಿ ಇಪಿಡಬ್ಲ್ಯೂ ನ ಪಾತ್ರ ಅತ್ಯಂತ ಮಹತ್ವದ್ದಾಗಿದೆ. ವರ್ತಮಾನದ ರಾಜಕೀಯದ ಒಡಲು ಒಂದು ಕಡೆ ಟೊಳ್ಳಾಗುತ್ತಿದೆ ಮತ್ತು ಯಾವುದು ತನ್ನನ್ನು ತಾನು  ಪ್ರಧಾನ ರಾಜಕೀಯ ಶಕ್ತಿ ಮತ್ತು ಅಭಿವ್ಯಕ್ತಿ ಎಂದು ಕೊಚ್ಚಿಕೊಳ್ಳುತ್ತದೋ ಅದು ಪೂರ್ತಿ ಪೊಳ್ಳುತನದಿಂದ ಕೂಡಿದೆ. ಇದಕ್ಕೆ ಪ್ರತಿರೋಧಿಯಾದ ರಾಜಕೀಯ ಅಭಿವ್ಯಕ್ತಿಗಳು ಸಂಘಟಿತವಾಗದೆ ಛಿದ್ರಗೊಂಡಿವೆ. ಪ್ರಧಾನ ಸ್ವರೂಪದ ರಾಜಕೀಯ ಅಭಿವ್ಯಕ್ತಿಯು ಜನರನ್ನು ಸುಗಮವಾಗಿ ತಲುಪುತ್ತಿದ್ದು ಆ ಕಾರಣದಿಂದಲೇ ಅದರ ಪ್ರಧಾನ ನಾಯಕರು ಪದೇಪದೇ ಸುಳ್ಳು ಭರವಸೆಗಳನ್ನು ಕೊಡುತ್ತಾ ಭ್ರಮಯೊಂದನ್ನು ಸೃಷ್ಟಿಸಲು ಸಾಧ್ಯವಾಗಿದೆ. ಇದರಿಂದಾಗಿ ಅಧಿಪತ್ಯ ಸಾಧಿಸಿರುವ ಪ್ರಧಾನ ರಾಜಕೀಯ ಶಕ್ತಿಗಳು ಒಂದೆಡೆ ಔಪಚಾರಿಕವಾದ ರಾಜಕೀಯ ಅಧಿಕಾರದ ರಚನೆಗಳಲ್ಲೂ ಮುಂದುವರೆಯಲೂ ಸಾಧ್ಯವಾಗುತ್ತಿದ್ದರೆ ಮತ್ತೊಂದೆಡೆ ತಮ್ಮ ಸಾಮಜೀಕ ಅಧಿಪತ್ಯವನ್ನು ನಿರಂತರವಾಗಿ ಮುಂದುವರೆಸಿಕೊಂಡು ಹೋಗಲು ಈ ಅಧಿಕಾರವನ್ನು ಬಳಸಿಕೊಳ್ಳುತ್ತಿದ್ದಾರೆ. 

ಅಧಿಕಾರದಲ್ಲಿರುವ ಈ ರಾಜಕೀಯ ಶಕ್ತಿಗಳ ವಿರುದ್ಧ ಹೋರಾಡುತ್ತಿರುವ ಪ್ರತಿರೋಧದ ಶಕ್ತಿಗಳು ಅಂತರಿಕವಾಗಿ ತಮ್ಮತಮ್ಮೊಳಗೆ ಛಿದ್ರಗೊಂಡಿರುವುದು ಮಾತ್ರವಲ್ಲದೆ ಬಹಿರಂಗವಾಗಿ ಟ್ವಿಟರ್, ಬ್ಲಾಗ್, ವಾಟ್ಸಾಪ್‌ಗಳಲ್ಲಿ ಅವರ ವಿರುದ್ಧ ನಡೆಸಲಾಗುವ ಅಪಪ್ರಚಾರದ ಮೂಲಕ ಅಂಚಿಗೆ ತಳ್ಳಲ್ಪಡುವ ನಿರಂತರ ಅಪಾಯವನ್ನು ಕೂಡಾ ಎದುರಿಸುತ್ತಿರುತ್ತಾರೆ. ಮತ್ತೊಂದು ಕಡೆ ತತ್‌ಕ್ಷಣದಲ್ಲಿ ಪ್ರತಿಕ್ರಿಯೆ ನೀಡುತ್ತ ಅಥವಾ ಸರಿಯಾದ ರಾಜಕೀಯ ಪ್ರತಿಕ್ರಿಯೆ ನೀಡುವ ತನ್ನ ಕ್ರಾಂತಿಕಾರಿ ಸ್ವ ಅರಿಮೆಯನ್ನು ಸಂತುಷ್ಟಿಗೊಳಿಸಿಕೊಳ್ಳುವ ತುರ್ತೂ ಸಹ ಈ ದಿನಮಾನಗಳಲ್ಲಿ ವ್ಯಕ್ತಿಗಳ ಚಿಂತನೆಯನ್ನು ಸಂಕುಚಿತಗೊಳಿಸುತ್ತಿದೆ. ಮತ್ತೊಂದು ತುದಿಯಲ್ಲಿ ಅದರಲ್ಲೂ ವಿಶೇಷವಾಗಿ ಪ್ರತಿಗಾಮಿ ಸ್ವ ಅರಿಮೆಯನ್ನು ಉಳ್ಳವರಿಗೆ ಇದು ಉನ್ಮಾದಯುತ ಪ್ರತಿಸ್ಪಂದನೆಗೆ ಬೇಕಿರುವ ಪ್ರೇರಣೆಯನ್ನು ನೀಡುತ್ತದೆ. ಅದೇನೇ ಇರಲಿ ಬಲಪಂಥೀಯ ರಾಜಕರಣವನ್ನು ಪ್ರತಿನಿಧಿಸುವ ಈ ಬಗೆಯ ಒತ್ತರಿಸಲ್ಪಟ್ಟ ಚಿಂತನೆಗಳು ಅತ್ಯಂತ ನಂಜಿನಿಂದ ಕೂಡಿದ ಸುಳ್ಳುಪೊಳ್ಳುಗಳನ್ನು ಬ್ಲಾಗ್ ಮತ್ತು ಟ್ವಿಟರ್ ನಂಥ ಮಾಧ್ಯಮಗಳನ್ನು ಬಳಸಿಕೊಂಡು ಬಿತ್ತರಗೊಳ್ಳುತ್ತವೆ.

ಈ ಬಗೆಯ ಎರದು ನಿಮಿಷಯದಲ್ಲಿ ತಯಾರಾಗುವ ಮ್ಯಾಗಿ ತಿನಿಸಿನಂಥ ಚಿಂತನೆಗಳು ಪರವರ್ತನಾಮುಖಿ ಚಿಂತನೆಗಳ ಬದಲಿಗೆ ತ್ವರಿತ ಚಿಂತನೆಗಳನ್ನಷ್ಟೇ ಹುಟ್ಟಿಸುತ್ತವೆ. ಗಂಭೀರ ಚಿಂತನೆಗಳಿಗೆ ಸನಿಹದ ಅಡ್ಡದಾರಿಯನ್ನು ಅರಸುವ ಈ ಪ್ರಕ್ರಿಯೆಯು ಆಳವಾಗಿರುವ ಬಿಕ್ಕಟ್ಟಿನ ಸಂಕೇತವೇ ಹೊರತು ಅದೇ ಸಮಸ್ಯೆಯ ಮೂಲವಲ್ಲ. ಜನರು ಸ್ವತಂತ್ರವಾಗಿ ಚಿಂತಿಸುವ ಸ್ವಾಯತ್ತತೆಯು  ಒತ್ತರಿಸಲ್ಪಟ್ಟಿರುವುದೇ  ಸಮಸ್ಯೆಂii ಅಸಲೀ ಮೂಲವಾಗಿದೆ. ಯಾವಾಗಲೂ  ರಾಜಕೀಯವಾಗಿ ಸರಿಯಾದ ನಿಲುವುಗಳನ್ನು ತೆಗೆದುಕೊಳ್ಳಬೇಕೆಂಬ ಅಭಿಲಾಷೆ ಅಥವಾ ಸಾಮಾಜಿಕ ಹೊಣೆಗಾರಿಕೆಯ ಹಿಂದೆ  ಪ್ರಗತಿಪರ ಸ್ವ ಅರಿಮೆಯು ರಾಜಕೀಯವಾಗಿ ಪ್ರಜ್ನಾವಂತವಾಗಬೇಕೆಂಬ ಅಗತ್ಯಕ್ಕಿಂತಲೂ ರಾಜಕೀಯವಾಗಿ ಸರಿ ಇರಬೇಕೆಂಬ ಅಗತ್ಯದಿಂದ ಪ್ರೇರೇಪಿತವಾಗಿರುತ್ತದೆ. ವಿಪರ್ಯಾಸವೆಂದರೆ ಈ ರೀತಿ ರಾಜಕೀಯವಾಗಿ ಸರಿ ಇರಬೇಕೆಂಬ ಅಗತ್ಯವೇ ಅದನ್ನು ತನ್ನ ವಿರೋಧಿಗಳೊಂದಿಗೆ ಅರ್ಥವಿಲ್ಲದ ಖಾಲಿ ಪದಗಳು ಅಥವಾ ಭಾಷೆಗಳ ಸುಳ್ಳು ಸಮರದಲ್ಲಿ ತೊಡಗುವಂತೆ ಮಾಡುತ್ತದೆ. 

ಇದರ ಜೊತೆಗೆ ಅವು  ಭಾಷೆಯಾಟದ ರಿವಾಜುಗಳೆಂದು ಕರೆಯಬಹುದಾದ ಪ್ರಕ್ರಿಯೆಯಲ್ಲಿ ಸಿಲುಕಿಕೊಳ್ಳುವುದರಿಂದ ಪರಿವರ್ತನಾಮುಖಿ ಚಿಂತನೆಗಳ ಬಿಕ್ಕಟ್ಟು ಮತ್ತಷ್ಟು ಸಂಕೀರ್ಣಗೊಂಡಿದೆ. ವರ್ತಮಾನದ ಸಂದರ್ಭದಲ್ಲಿ ಪ್ರಧಾನ ಧಾರೆ ರಾಜಕೀಯವನ್ನು ಪ್ರತಿನಿಧಿಸುವವರು ಮತ್ತು ಅದಕ್ಕೆ ವಿರುದ್ಧವಾದ ಪ್ರತಿರೋಧಿ ರಾಜಕೀಯ ಚಿಂತನೆಗಳನ್ನು ಪ್ರತಿನಿಧಿಸುವವರು ಎಂಥಾ ವಾಗ್ವಾದಗಳಲ್ಲಿ ತೊಡಗುತ್ತಿದ್ದಾರೆಂದರೆ ಅಲ್ಲಿ ಅರ್ಥಪೂರ್ಣ ಸಂವಹನವು ಸಾಧ್ಯವಾಗದೆ ಅವೆಲ್ಲವೂ ಕೇವಲ ಒಂದು ರಿವಾಜಾಗಿಬಿಡುತ್ತಿದೆ. ಉದಾಹರಣೆಗೆ ತನ್ನ ವೈಫಲ್ಯವನ್ನು ಮರೆಮಾಚಿಕೊಳ್ಳುವ ಸಲುವಾಗಿ ಸರ್ಕಾರವು ತನ್ನ ಎದುರಾಳಿಗಳ ಮೇಲೆ ರಾಷ್ಟ್ರದ್ರೋಹಿ ಅಥವಾ ಹುಸಿ ಜಾತ್ಯತೀತವಾದಿ ಎಂಬ ವಿಶೆಷಣಗಳನ್ನು ಬಳಸುತ್ತದೆ. ಆದರೆ ಪ್ರಭುತ್ವವು ಯಾವ ರೀತಿ ತನ್ನ  ದಾಸ್ತಾನಿನಲ್ಲಿ ಕೂಡಿಟ್ಟಿರುವ ಸವಕಲು ಪದಗಳನ್ನು ಪದೇಪದೇ ಬಳಸುತ್ತದೆಯೋ ಅದೇ ರೀತಿ  ಪ್ರತಿರೋಧಿ ರಾಜಕೀಯವನ್ನು ಮಾಡುವ ಶಕ್ತಿಗಳೂ ಸಹ ಸವಕಲಾದ ಪದಗಳನ್ನೇ ಬಳಸುತ್ತವೆ. ಪ್ರಭುತ್ವವನ್ನು ವಿರೋಧಿಸುವ ಕ್ರಾಂತಿಕಾರಿಗಳು ಪ್ರಭುತ್ವದ ಭಾಷೆಂiನ್ನೇ ತಲೆಕೆಳಗು ಮಾಡಿ ಬಳಸುವುದು ಸಾಮಾನ್ಯವಾಗಿಬಿಡುತ್ತಿದೆ.

ಇಪಿಡಬ್ಲ್ಯೂ ಎಂಬುದು ಬಹಿರಂಗ ಪುಸ್ತಿಕೆ. ಅದು ಎಲ್ಲಾ ಬಗೆಯ ಹೋರಾಟನಿರತ ಗುಂಪುಗಳಿಗೆ  ಧ್ವನಿಯಾಗಬೇಕೆಂಬ ಸಮಾನ ಉದ್ದೇಶದಿಂದ ಒಟ್ಟುಗೂಡುವ ಆ ಮೂಲಕ ತಮ್ಮ ರಾಜಕೀಯ ಸರಿತನವನ್ನು ಸಾಬೀತು ಮಾಡಬಯಸುವ ಕೆಲವೇ ಕ್ರಾಂತಿಕಾರಿಗಳ ವಸಾಹತುವಲ್ಲ. ಮತ್ತೊಂದು ರೀತಿಯಲ್ಲಿ ಹೇಳಬೇಕೆಂದರೆ  ಈ ಉಚ್ಚವರ್ಗೀಯ ಬುದ್ಧಿಜೀವಿ ವಸಾಹತುಗಳು, ವಿದ್ವಾಂಸರ ಗುಂಪುಗಳು, ಸಾಮಾಜಿಕ ಕಾರ್ಯಕರ್ತರು ತಮ್ಮ ಜೊತೆ ಸಮ್ಮತಿಸುವವರನ್ನು ಮಾತ್ರ ಪ್ರತಿನಿಧಿಸುತ್ತಾ, ತಮಗೇ ಮಾತ್ರ ಅದ್ಭುತ ಎಂದು ತೋರುವ ಭಾಷೆಯಲ್ಲಿ ಪರಸ್ಪರರಿಗೆ ಮಾತ್ರ ಬರೆದುಕೊಳ್ಳುತ್ತಾ, ತಮ್ಮ ತಮ್ಮ ಬರಹದ ಸಾರಸತ್ವ ಮಾತ್ರ ಆದರ್ಶಪ್ರಾಯವಾದದ್ದು ಎಂದು ಭಾವಿಸಿಕೊಳ್ಳುತ್ತಾರೆ. ಇಂಥಾ ಸ್ವಮೋಹಿ ವಸಾಹತುಗಳಲ್ಲಿರುವ ಕ್ರಾಂತಿಕಾರಿಗಳ ಅಭಿವ್ಯಕ್ತಿಯ ಸತ್ವವನ್ನು ಅವರು ಸಾಮಾನ್ಯವಾಗಿ ಬಳಸುವ ನಮಗೆಲ್ಲರಿಗೂ ತಿಳಿದಿರುವಂತೆ ಎಂಬ ವಾಕ್ಯವು ಕಟ್ಟಿಕೊಡುತ್ತದೆ. ಅಂಥ ಸಂದರ್ಭಗಳಲ್ಲಿ ವಿಮೋಚನೆಯ ರಾಜಕಾರಣವು ಒಂದು ಸಾರ್ವಜನಿಕ ಯೋಜನೆಯಾಗುಳಿಯುವುದಿಲ್ಲ.

ಆದರೆ ಈ ಪತ್ರಿಕೆಯು ಕೆಲವೇ ಜನರ ಹಿಡಿತದಲ್ಲಿರುವ ಬ್ಲಾಗ್ ಆಗಿರದೆ ಒಂದು ಬಹಿರಂಗ ಪುಸ್ತಿಕೆಯಾಗಿದೆ. ಭಿನ್ನ ದೃಷ್ಟಿಕೋನಗಳನ್ನು ಹೊಂದಿರುವ ಜನರ ಅಸ್ಥಿತ್ವದ ತಾವುಗಳನ್ನು ಆಧರಿಸಿ ಭಿನ್ನಭಿನ್ನ ವಿಮರ್ಶಾತ್ಮಕ ಒಳನೋಟಗಳು ಮೂಡಿಬರುತ್ತವೆ ಎಂದು ಈ ಪತ್ರಿಕೆಯು ಭಾವಿಸುತ್ತದೆ. ಮೇಲಾಗಿ ವಿಮರ್ಶಾತ್ಮಕ ಒಳನೋಟಗಳಿಗೆ ಒಂದು ನಿರ್ದಿಷ್ಟವಾದ ವಿಳಾಸವೇನೂ ಇರಬೇಕಿಲ್ಲವೆಂದೂ, ಅದು ಎಲ್ಲಾ ಬಗೆಯ ವಿಮೋಚನಾ ಹೋರಾಟಗಳ ನೆಲೆಯಿಂದಲೂ ಹುಟ್ಟಿಬರುತ್ತದೆಂದೂ ಇಪಿಡಬ್ಲ್ಯೂ ನಂಬುತ್ತದೆ. ಇಂಥಾ ವಿಮರ್ಶಾತ್ಮಕ ಮತ್ತು ಆದ್ದರಿಂದಲೇ ಪರಿವರ್ತನಾ ಶಕ್ತಿಯುಳ್ಳ ಚಿಂತನೆಗಳನ್ನು ಪ್ರಜಾತಾಂತ್ರೀಕರಿಸುವಂಥಾ ಅನನ್ಯ ಸ್ಥಾನದಲ್ಲಿ ಈ ಪತ್ರಿಕೆ ಇದೆ. ವಿವಿಧ ಗುಂಪುಗಳ ನಡುವೆ ಸೇತುವೆಯನ್ನು ಕಟ್ಟುವ  ಮೂಲಕ ಚಿಂತನೆಗಳನ್ನು ಪ್ರಜಾತಾಂತ್ರೀಕರಿಸಬೇಕೆಂಬ ಆದರ್ಶ ಆಶಯಗಳಲ್ಲಿ ಅದು ಅಭಿವ್ಯಕ್ತಗೊಂಡಿದೆ. ಇಪಿಡಬ್ಲ್ಯೂನ ಡಿಜಿಟಲ್ ಅವತರಣಿಕೆ ಮತ್ತು ಸಂಪಾದಕೀಯ ಅನುವಾದ ಯೋಜನೆಗಳು ಎಲ್ಲೆಡೆಯಿಂದ ಪರಿವರ್ತನಾ ಚಿಂತನೆಗಳನ್ನು ಸಂಘಟಿಸಲು ಬೇಕಾದ ವೇದಿಕೆಯನ್ನು ಒದಗಿಸುತ್ತಿದೆ.

ಮಾನವರ ವಿಮೋಚನೆಯನ್ನು ಒಂದು ಸಾರ್ವಜನಿಕ ಯೋಜನೆಯನ್ನಾಗಿ ಮಾಡುವ ಇಪಿಡಬ್ಲ್ಯೂ ನ ಯೋಜನೆಯಲ್ಲಿ ಪ್ರತಿಯೊಬ್ಬರೂ ಭಾಗವಹಿಸಬೇಕೆಂದು ನಾನು ಕಳಕಳಿಯ ಮನವಿ ಮಾಡುತ್ತೇನೆ.

ಗೋಪಾಲ್ ಗುರು

ಮುಂಬೈ.

                                                                                            

Comments

(-) Hide

EPW looks forward to your comments. Please note that comments are moderated as per our comments policy. They may take some time to appear. A comment, if suitable, may be selected for publication in the Letters pages of EPW.

Back to Top